ଅକୁହା କଥା
ଅକୁହା କଥା
ମଣିଷ ଜୀବନେ ଏମିତି ବି କିଛି
ଥାଏ ଅତି ଗୋପନୀୟ,
କାହାରି ଆଗରେ କହି ହୁଏ ନାହିଁ
ନୁହେଁ ମଧ୍ୟ ସହନୀୟ |
ଏମିତି ଘଟଣା ସଭିଙ୍କ ଜୀବନେ
ଆସିଥାଏ ଧକା ଦେଇ,
ହଜେନା ମନରୁ କୁହୁଳୁ ଥାଏ ସେ
ସବୁଦିନ ସ୍ମୃତି ହୋଇ |
କେବେ ଅଜାଣତେ କେବେ ଚେତନାରେ
ଭୁଲ କିଛି ହୋଇଯାଏ,
ପରିଣାମ ଯାର ଅତି ଭୟଙ୍କର
ଜୀବନେ ବେଦନା ଦିଏ |
ହାରିବା ହେଉ କି ଜିତିବା ବି ହେଉ
ହୁଏନାହିଁ ସମ୍ବରଣ,
ଯେହେତୁ ହୃଦୟ ଗ୍ରହଣ କରେନା
ପରାଜିତ ହୁଏ ମନ |
ପାପର କାଳିମା ବୋଳି ହୋଇଯାଏ
କେହି ବି ନଜାଣୁ ଜଣେ,
ନିଜେ କିନ୍ତୁ ସଦା ଜଳି ମରୁଥାଏ
ଲୁଚି ଲୁଚି ନିୟନ୍ତ୍ରଣେ |
ଅତି ଆପଣାର ସ୍ନେହୀଜନ ପାଶେ
ବିଶ୍ୱାସ ହରାଇ ଥାଏ,
ବିବେକ ଦଂଶନେ କହି ହୁଏ ନାହିଁ
ମନ ଛଟପଟ ହୁଏ |
କହିବାକୁ ଥରେ ଭୟ ଲାଗେ ତାକୁ
ତେଣୁ ସେ ପାରେନା କହି,
ଅକୁହା କଥା ଯେ ଅଙ୍ଗେ ନିଭାଇଛି
ଦେହେ କଳା ବୋଳିଦେଇ |