ଅଜଣା ସମ୍ପର୍କ - ମଣିଷପଣିଆ
ଅଜଣା ସମ୍ପର୍କ - ମଣିଷପଣିଆ
ଭୁଲିବାକୁ ଚେଷ୍ଟା କଲେ ବି ଭୁଲି ତ ହୁଏନା
ଅତୀତକୁ ଫେରି ଏବେ ଖାଲି ମୁଁ ଖୋଜୁଛି
ସ୍ମୃତିର ସବୁ ଫର୍ଦକୁ ତନ୍ନ ତନ୍ନ କରି ଦେଖୁଛି
ସମ୍ପର୍କର ନୂଆ ମୁହଁକୁ ଅଜଣା ସମ୍ପର୍କ କହୁଛି |
ନୁହେଁ ସିଏ ମୋର କେହି ନିଜର ଅତି ଆପଣାର
ନୁହେଁ ଦୂର ସମ୍ପର୍କୀୟ ଦୂରରୁ ଜଣା କେହି
ନୁହେଁ କେହି ପରିଚିତ ଆକସ୍ମିକ ଅତିଥି ଅବା ପଡିଶା
କିନ୍ତୁ ମନରେ ରହିଛି ଅଜଣା ସମ୍ପର୍କ ସେହି |
କଥା ଅଟେ କିଛି କ୍ଷଣର ବିନା ସ୍ୱାର୍ଥରେ ସିଏ
ସାଥୀ ହେଲା ଥିଲା ଖାଲି ନିମିଷେକ ଖାଲି
ହୃଦୟରେ ଦୃଢ଼ତା ଭରିଲା ଏହି ସ୍ୱାର୍ଥପର ନିଷ୍ଠୁର ଦୁନିଆରେ
ଆମ ଅଜଣା ସମ୍ପର୍କ ଏବେ ବନ୍ଦନାର ପାତ୍ର |
ସେହି ସବୁ ବିପଦ ଆଉ ଆଶଙ୍କାର ସମୁଦ୍ର ମଧ୍ୟରେ
ଯେବେ ଉବୁ ଟୁବୁ ହୋଇ ଯାଉଥିଲି ବୁଡି
ମୋର ବଞ୍ଚିବାର ଆଶା ଆକାଂକ୍ଷାର ନୌକାକୁ ଥଳ ଦେଖାଇଲା
ଭରସା ଦେଲା ସେହି ଅଜଣା ସମ୍ପର୍କର ରଡି |
ବୁଝି ଥିଲା ସିଏ ସତେ ମଣିଷପଣିଆର ପ୍ରକୃତ ଅର୍ଥ
ହାତ ଧରି ଟାଣି ଆଣି ଠିଆ କରାଇଲା
ସେହି ଅନ୍ଧାରୁଆ ଖାଇରେ କାହାର ଧକ୍କାରେ ପଡିଲା ବେଳେ
ପରିଚୟ ନଦେଇ ଅଜଣା ସମ୍ପର୍କର ବ୍ୟକ୍ତି ଚାଲିଗଲା |
ଏବେ ତାର ରୂପ ଆଉ ସେହି ସ୍ୱଳ୍ପ ବଚନ
ରହିଛି ଲୁଚି ଏହି ମନର ସ୍ମୃତିରେ ମୋର
ଆଶ୍ଚର୍ଯ୍ୟ ଲାଗୁଛି ଭାବି ସମ୍ପର୍କର ନୂଆ ମୁହଁ କଥା
ମଣିଷପଣିଆ ନାମ ଦେଇଛି ସେହି ଅଜଣା ସମ୍ପର୍କର |
ଦିଏ ନାହିଁ କେବେ କିଛି ସମ୍ପର୍କର ଦ୍ୱାହି ସିଏ
ମାଗେ ନାହିଁ କିଛି ଅଧିକାର ସ୍ୱାର୍ଥପର ହୋଇ
ଲୁଚିଛି ଏହି ସମ୍ପର୍କର ନୂଆ ମୁହଁ ମଣିଷପଣିଆ ଏବେ
ରହିଛି ଏକ ଅଜଣା ସମ୍ପର୍କ ରୂପ ନେଇ |
ଭାବି ଭାବି ଏହି କଥା ମନ ହୁଏ ବ୍ୟାକୁଳ
ମଣିଷପଣିଆକୁ ଦୁନିଆରେ ଏବେ ପ୍ରତିଷ୍ଠିତ କରିବା ପାଇଁ
ସୁନ୍ଦର ସମାଜ ହେବ ଏହି ଅଜଣା ସମ୍ପର୍କ ପାଇ
ଲୁପ୍ତ ନୁହେଁ ଲୁକ୍କାୟିତ ଯାହା ଦୁନିଆ ପାଇଁ |