ଅଜବ ସମ୍ପର୍କ

ବଡ଼ ଅଜବ ଆମର ଏ ସମ୍ପର୍କ

କେତେ ରାଗରୁଷା ମାନଅଭିମାନ

ଯିଏ ଯାହା କହିଲେ କହୁ

ଆମର କ'ଣ ଆସେ ଯାଏ।

ତୋ ମୋ ଭିତରେ ତ

ଏମିତି ଚାଲିଥିବ

ଏଇଟା କୋଉ ନୂଆ କଥା ଯେ,

ଇଏତ ନିତିଦିନିଆ

ସମୟ ସାରଣୀ ହୋଇଗଲାଣି ।

ଦେଖ ତ !

ସମସ୍ତ ଙ୍କ ଠାରୁ 

ନିଆରା ଆଉ ସ୍ବତନ୍ତ୍ର

ଆମର ଏ ସଂପର୍କ ।

କେବେ ପ୍ରେମିକା ସାଜି

ବକ୍ଷକୁ ଜାବୁଡ଼ି ଧରି

ପ୍ରୀତିର ରଙ୍ଗରେ

ରଙ୍ଗେଇ ଦେଉଛ ।

ମାଆ ଭଳି ପୁଣି ଭଲପାଇ

ପେଟକୁ ଆଉଁସି

ନାନାଦି ବ୍ୟଞ୍ଜନରେ

ଭରପୁର ଆହାର ଦେଉଛ।

ଭଉଣୀ ପରି କେବେ

ସବୁ ରାଗରୁଷା ଭୁଲି

ବିପଦ ଆପଦର

ସାଜିଛ ରକ୍ଷା କବଚ ।

ସାଙ୍ଗଟିଏ ହୋଇ

କେତେ ଭଲମନ୍ଦ

ସୁଖଦୁଃଖ ବୁଝି

ବୁଝେଇ ପାରିଛ ।

କିଏ କେତେ କଥା କହୁଛି

ତୋ ନାଆରେ

କାଇଁ କେବେ ତ ମୁଁ

କିଛି ବ୍ୟତିକ୍ରମ ଦେଖୁନି

ମୋ ପ୍ରତି ତୁମ ପ୍ରେମରେ ।।