ଅଗାଡ଼ି

ଦାୟିତ୍ଵକୁ ବୁଝେ ଉପଯୁକ୍ତ ଲୋକ କରୁପଛେ ଯେଉଁ ବୃତ୍ତି,

ପୂରଣ ହୋଇଲେ ମାନ-ଲକ୍ଷ୍ୟ ତା'ର ମିଳେ ତାକୁ ଆତ୍ମତୃପ୍ତି ।

ପ୍ରଶଂସା ସମ୍ମାନ ଲୋଡ଼ାନାହିଁ ତାକୁ ଲୋଡ଼ାନାହିଁ ପୁରସ୍କାର,

ସଫଳତା ପାଇ ଅହଂକାରକୁ ସେ କରିଥାଏ ବହିଷ୍କାର ।

ସାହିତ୍ୟ ସାଧକ କଳାର ପୂଜାରୀ ସଂସ୍କୃତିର ସଂରକ୍ଷକ,

ନିଷ୍ଠା ଶ୍ରମ ତ୍ୟାଗ ପ୍ରେମବଳେ ସିଏ ବଢ଼ାନ୍ତି ଜାତିର ଟେକ ।

ଧାନରେ ଅଗାଡ଼ି ଚାଉଳରେ ଗୋଡ଼ି ଲୁଚିଛପି ମିଶିଥାଏ,

ପାଛୁଡ଼ିବା ବେଳେ ଅଗାଡ଼ି ଯେତେକ ଧାନର ଆଗକୁ ଯାଏ ।

ଚାଉଳର ଗୋଡ଼ି ବଡ଼ କଉଶଳେ ତଳେଯାଇ ଲୁଚିରହେ, 

ଅସଲ ବେଳକୁ ଦାନ୍ତ ଭାଙ୍ଗିଦେଇ ମୁଁ ବଡ଼ ବୋଲି କହେ ।

ସାଧକ ଦଳରେ ମିଶି ରହିଥା'ନ୍ତି କିଛି ଠକ-ଟାଉଟର,

କ୍ଷୀର ସିଝିସିଝି ଥଣ୍ଡା ହେଇଗଲେ ଉଠାଇ ଖାଆନ୍ତି ସର । ।