ଅଦିନ ମେଘ

ଭାରିଦୁଷ୍ଟ ଏଇ ଅଦିନ ମେଘଟା

କରିଦିଏ ବାଟବଣା

ଯୌବନ ସାଗରେ ଜୁଆର ପରିକା

ଲଙ୍ଘିଯାଏ ସବୁସୀମା ।।

ମନେପଡେ ଆଜି ପବନର ସାଥେ

ଆସିଥିଲା ଏଇ ମେଘ

ଓଢଣୀକୁ ତୁମ ଉଡେଇ ନେଇ ସେ

ବଦଳେଇଥିଲା ଦିଗ ।।

ରାଗମିଶା ଲାଜ ମୁହଁରେ ତୁମର

ହୋଇଥିଲା ପ୍ରସ୍ଫୁଟିତ

ଢାଙ୍କିଦେଲି ଯେବେ ଓଦା ଦେହ ତୁମ

ହେଲ ତୁମେ ଶିହରିତ ।।

ଥମୁ ନ ଥିଲା ତ ବର୍ଷାର ତାଣ୍ଡବ

ନଖ ଖୁଣ୍ଟୁଥିଲ ତୁମେ

ନିର୍ଜନ ପଥରେ ପାନ୍ଥଶାଳା ଦେଖି

ଲୁଚି ଯାଇଥିଲେ ଆମେ ।।

ବିଜୁଳି ଚମକେ ଭୟଭୀତ ହୋଇ

କଲ ଯେବେ ଆଲିଙ୍ଗନ

ବିଜୁଳି ଖେଳିଲା ଦେହସାରା ମୋର

ସଂସ୍ପର୍ଶରେ ପ୍ରିୟା ତୁମ ।।

ଅନୁମତି ବିନା ଛୁଇଁଦେଲି ଯେବେ

ଦୂରେ ଗଲ ତୁମେ ଚାଲି

ଖେଳୁଥିଲା ତୁମ ଅଧରରେ ହସ

ଚାହୁଁଥିଲ ବୁଲି ବୁଲି  ।।

ବୁଝିପାରିଲିନି ଇସାରାକୁ ତୁମ

ଅଧାରେ ରହିଲା ପ୍ରେମ

ଫେରି ଯାଇଥିଲା ଅଦିନ ମେଘଟା

ଭିଜେଇ ଦେଇ ଏ ମନ ।।