ଅଦିନ ଝଡ଼

ସମୟ ସୂଚନା କିଛି ବି ନଥାଇ

ହଠାତ୍ ପଶି ଆସି ଅଦିନ ଝଡ଼

କରେ ଛାରଖାର ଜୀବନ କାହାର

ଭାଙ୍ଗିରୁଜି ତା’ର ଧଇର୍ଯ୍ୟ ବାଡ଼ ।

ତାହାର ଆଘାତ ବେଦନାସିକ୍ତ

ବିଶ୍ବାସ ଭରସା ହଜାଇ ଦିଏ

ଭରିଲେ ବି ଯେତେ ଉତ୍ସାହ ପ୍ରେରଣା

ଥୟ ଧରିବାକୁ ସମୟ ନିଏ ।

କାହିଁକି ଆସିଲା  କ’ଣ କେତେ ହେଲା

ହିସାବ ଖୋଜଇ କ୍ଷୟକ୍ଷତିର

ଆଖିର ଲୋତକ ଆଖିରେ ମରଇ

କହି ନ ପାରଇ ଆଗେ କାହାର ।

ଅତୀତକୁ ଝୁରି ଭଗ୍ନ ହୃଦୟରେ

ଗଣୁଥାଏ ଯେତେ ଅଭୁଲା ଦିନ

ସତେ ମେରୁଦଣ୍ଡ ଟେକି କି ପାରିବ

ମନ ଭିତରଟା ସନ୍ଦିହାନ ।

ପାଇଯାଏ ଯେବେ ଝଡ଼ର ସୂତ୍ରଟା

ସଳଖ ହେବାକୁ କରେ ସାଧନା

ନିଜ ମନ ସହ ଯୁଝିଯୁଝି ନିତି

ଉଦ୍ୟମେ ସମ୍ପର୍କରେ ବୁଝାମଣା ।

ଜୀବନଟା ଅଛି ଝଡ଼ ବି ରହିଛି

ମାତ୍ର ଯେବେ ଉଭା ଅଦିନ ଝଡ଼

ସାହସ ଶକତି ଧୈର୍ଯ୍ୟକୁ ଏକାଠି

କଲେ ଭାଙ୍ଗିଯିବ ତାହାର ତୋଡ଼ ।।