ଅଧରାମୃତ

ବଚନ ଯଦିତୁ କହିପାରୁଥାଆନ୍ତୁ

ଆଖିରେ କାହିଁକି କହନ୍ତୁ କଥା

ଭୋଜନ ଯଦିତୁ ଦେଇପାରିନଥାନ୍ତୁ

ଷାଠିଏ ପଉଟି କାହିଁକି ରନ୍ଧା

ହାତ ନାହିଁ ବୋଲି କେମିତି କହିବି

ଟେକି ଚାଲେ ମଣିଷ ମଥା

ପାଦ ନାହିଁ ବୋଲି କେମିତି କହିବି

ତ୍ରିପାଦ ମେଦିନୀ ଦେଇଛୁ ସଖା

ଦେହ ନାହିଁ ବୋଲି କେମିତି କହିବି

ପହଣ୍ଡି ଦେଖନ୍ତି ପିତାମାତା

ଅଧରପଣାରେ ତୁଳସୀ ଟିକିଏ ରହି

ଦେଉଛି ଅମୃତ ବାର୍ତ୍ତା

ଅଧରପଣା ପିଇକି ବଞ୍ଚିଛି ଜଗତ

ପ୍ରଭୁ ତୁମେ ଜଗତପିତା

କି ବର୍ଣ୍ଣିବି ଛାର ମୁଁ ମାତର ଡର ଭୟ

ଛାଡେ ପିଇ ଅଧରାମୃତ ଏକକିତା

ତୁମ ବଡ଼ପଣ ବଡଦାଣ୍ଡେ ଦେଖାଇ ପ୍ରଭୁ

ମନେ ଭରିଦିଅ ପବିତ୍ରତା

ଜାତି ଧର୍ମ ବର୍ଣ୍ଣ ନିର୍ବିଶେଷରେ ପରଂବ୍ରହ୍ମ

ତୁମେ ସୃଷ୍ଟିର କର୍ତ୍ତା

ତୁମ ଅଧରର ଅମୃତମଣୋହି ଅଧରପଣାରେ

ଜଳେ ଜୀବନ ସଳିତା

ଶଙ୍ଖ ଚକ୍ର ଗଦା ପଦ୍ମ ସାଥେ ଜଗନ୍ନାଥ

ରଥ ପଥ ତୁମ ଚଳନ୍ତି ଗୀତା