ଅଭୁଲା ସେ ମୁହୂର୍ତ୍ତ (କାଳ୍ପନିକ )

କନକ କିରଣ ବୁଣି ଦେଉଥିଲେ ଆକାଶରେ ଅଂଶୁମାଳୀ

ବର୍ଣ୍ଣିଳ ବିଭାରେ ମେଘଖଣ୍ଡମାଳେ ଖେଳୁଥିଲେ ଲୁଚକାଳି |

ବାରିବାହ ତଳେ ଦୂର ଚକ୍ରବାଳେ ବକାଳିକା ମାଳିକାରେ

ଶୋଭାପାଉଥିଲା ଶ୍ୟାମଶୈଳ ଗଳେ ମଲ୍ଲୀହାର ପରକାରେ |

ଖରା ଛାଇର ଏ ଗୋଡ଼ିଆ ଗୋଡ଼େଇ ଖେଳ ହରିତ କେଦାରେ

କାଶତଣ୍ଡୀ ମଣ୍ଡି ନଦୀ ପଠାଧାର ସଜ୍ଜିତ ଶୋଭା ସମ୍ଭାରେ |

ନଦୀ ବାଲୁକାର କୋମଳ ଶଯ୍ୟାରେ ମୃଦୁମନ୍ଦ ପ୍ରଭଞ୍ଜନ

ଶୌକ୍ତିକ ମୌକ୍ତିକ କରେ ଚକଚକ ହରିନେଲା ତନୁ ମନ |

ସେତୁ ପରେ ରଖି ବାଇକି ଝଟତି କଲି ପଠାକୁ ଗମନ

କଣ ରହିଛି ପଠାର ମଧ୍ୟରେ କରିବାକୁ ଅନ୍ୱେଷଣ |

କାଶତଣ୍ଡୀ ଶର ସଂଗ୍ରହେ ତତ୍ପର ଜଣେ ରୂପସୀ ଲଳନା

କୁରଙ୍ଗୀ ନୟନା ସ୍ବର୍ଣ୍ଣ ଅପଘନା ସୁନ୍ଦରୀ ନବ ଯୌବନା |

ସରଗ ଅପ୍ସରୀ ରୂପରାଜ୍ୟ ପରୀ ମର୍ତ୍ତ୍ୟ ବିହରଣ ପାଇଁ

ସୁରମ୍ୟ ନିର୍ଜନ ପରିବେଶ ଦେଖି ଆସିଛି ଅବା ଓହ୍ଲାଇ |

ଅଳପ ଦୂରରେ ବାଳୁତ ଭାଇଟି ଖେଳୁଥାଏ ବାଲି ପରେ

ମୋତେ ଦେଖି ବାଳା ଅଳପ ହସିଲା ଲଜଭରା ବଦନରେ |

ଗୋଲାପୀ ଅଧରେ ଗଜମୋତି ହାସ ଖେଳାଇଲା ଶିହରଣ

ଧୀର ପଦପାତେ ମୃଦୁ ହସି କଲି ବାଳା ପାଶେ ଆଗମନ |

କଣ୍ଠ ସ୍ୱର ତାର ଆହାକି ମାଧୁର୍ଯ୍ୟ ପୀନକୁଚା ପିକ ଭାଷୀ

ଚୁର୍ଣ୍ଣିତ କୁନ୍ତଳ ସ୍ବେଦ ବିନ୍ଦୁ ଜଳ ଅନୁପମ ଶୋଭାରାଶି |

ପରିଚୟ ନେଇ ଜାଣିଲି ନିକଟ ଗ୍ରାମେ ଅବଳାର ଘର

କୈବର୍ତ୍ତ କନ୍ୟାସେ ଆସି ପିତାଦେଶେ ଭ୍ରମେ ଭ୍ରାତା ସହିତର |

ଚାରି ଚକ୍ଷୁ ଯେବେ ମିଶି ଯାଉଥିଲା ପରସ୍ପର ଆକର୍ଷିତ 

ମନର ବାସନା ଚରିତାର୍ଥ ପାଇଁ ହେଉଥିଲି ଉତ୍କଣ୍ଠିତ |

ପରାଶର ମତ୍ସ୍ଯଗନ୍ଧା ପରିଣୟ କରେ ମାନସ ମନ୍ଥନ

ହୋଇ କାମାତୁର ମିଳନେ ତତ୍ପର ଗଣ୍ଡେ ଆଙ୍କିଲି ଚୁମ୍ବନ |

ନକରୁ ବାରଣ ଉଲ୍ଲସିତ ମନ ଗାଢ଼େ କଲି ଆଲିଙ୍ଗନ

ସହସା ଶୁଭିଲା ସାନଭାଇ ସ୍ୱର ବାପା ବାପା ଆବାହନ |

ହୋଇଲୁ ବିଛିନ୍ନ କଲୁ ଵିଲୋକନ ନାବବାହି ଆସେ ପିତା

ଅଳ୍ପ ଦୂରେ ରହି ବାଳାଠୁଁ ଦୂରେଇ ଭାଗ୍ୟକୁ ମଣିଲି ପିତା |

ଅଭୁଲା ସେ ସ୍ମୃତି ଅପାସୋରା ପ୍ରୀତି ରହିଛି ଏବେ ଜୀବନ୍ତ

ଦଇବ ସୁଯୋଗ ହେଲାନାହିଁ ଭୋଗ ମନେ ହୁଏ ମର୍ମାହତ |