ଅଭିସାରିକାର ବେଦନା

ନୁହଁ ମୁଁ ଗୋପୀକା ନୁହେଁ ରାଧାରାଣୀ

ତଥାପି ପ୍ରେମେ ବାୟାଣୀ

ନାମ ଅନ୍ତର୍ଯ୍ୟାମୀ ଅନ୍ତର ବେଦନା

ପାରୁ ନ କି ତୁମ୍ଭେ ଜାଣି

ଅଭିସାରିକା ମୁଁ ସାଜେ ତୁମ୍ଭ ପାଇଁ

ନିଶି ହେଲେ ହୁଏ ବେଶ

ଅନ୍ଧୁଣୀ ହେଲିଣି ପଥ ଚାହିଁ ଚାହିଁ

କେବେ ପୁରିବ ମୋ ଆଶ

ପାଷାଣୀ ଅହଲ୍ୟା ଉଦ୍ଧାରିଛ ସିନା

ପାଷାଣ ହୃଦୟ କର

ଦୋଷ କି କରିଛି ଚିତ୍ତ ମୋ ସମର୍ପି

ବିରହ ଜ୍ୱାଳାରେ ମୋର

ଷୋଳ ସସ୍ର ଗୋପୀ ରମିଛ ଗୋସେଇଁ

କୁବୁଜା କୁଜ ଉଦ୍ଧାରି

ଏଡ଼େ ପାତକି ମୁଁ ମିଳିଲାନି ବାରେ

କରୁଣା କଟାକ୍ଷ ବାରି

ଭାବଗ୍ରାହୀ ତୁମ୍ଭେ ବିଡୁଛ କି ଭାବ

କରୁଛ ପ୍ରେମ ପରୀକ୍ଷା

ତୁମ୍ଭ ନାମ ଧରି ଜୀବ ଯିବା ଯାଏ

କରିଥିବି ମୁଁ ପ୍ରତୀକ୍ଷା

କରିବିନି ଦୁଃଖ ତଥାପି ହେ ନାଥ

ଯଦି ଦେବ ନାହିଁ ଦେଖା

ଏ ଘଟ ଛାଡିଲେ ତୁମ୍ଭ ପଦ୍ମପାଦେ

ବାରେ ସ୍ଥାନ ଦେବ ପ୍ରାଣସଖା