ଅଭିନୟ
ଅଭିନୟ
କେତେ ରୂପ ନେଇ ଆହେ ମହାବାହୁ
ଅଭିନୟ ଏଠି କରିବି
ଅଭିନୟ ଠାରୁ ମୁକ୍ତ କର ପ୍ରଭୁ
ତୁମ ଚରଣରେ ରହିବି ।
ଗୋଟିଏ ଚରିତ୍ର କରିବାକୁ ଯାଇ
ଅନ୍ୟକୁ କଷଣ ଦେଉଛି
ମିଛ ମାୟା ଏହି ଚରିତ୍ର ମଧ୍ୟରେ
ପ୍ରତି କ୍ଷଣେ କ୍ଷଣେ ମରୁଛି ।
ମରିବା ବଞ୍ଚିବା ବଡ଼କଥା ନୁହେଁ
ସବୁତ ତୁମରି ରଚନା
ରଚନା ମଧ୍ୟରେ କଷଣ ଗୁଡାକ
ତାହାବି ତୁମରି କଳ୍ପନା ।
ସୃଷ୍ଟିର କରତା ଆହେ ମହାପ୍ରଭୁ
ନିଶ୍ଚେ ଜାଣୁଛ ସବୁ ଦୁଃଖ
ମତେ ଦୁଃଖି ଦେଖି ଆହେ ନରହରି
ତୁମେ ପାଉଛକି ହେ ସୁଖ ।
ତୁମେ ଯଦି ପ୍ରଭୁ ସୁଖ ପାଉଅଛ
ଦୁଃଖ ଦିଅ ମତେ ଯାହା
ଦୁଃଖ ଦେଇ ପ୍ରଭୁ ହାତ ଛାଡିବନି
ପାଖେ ଥାଇ ହେବ ସାହା ।
ଯଦି ତୁମେ ପ୍ରଭୁ ସାହା ହେବ ନାହିଁ
ସାରିଦିଅ ମୋ ଅଭିନୟ
ଅଭିନୟ ମୋର ସରିଗଲେ ପ୍ରଭୁ
ହେବି ଯେ ତୁମଠି ବିଲୟ
ହେବି ଯେ ତୁମଠି ବିଲୟ ।