ଅଭିନନ୍ଦନ ସୁନାଝିଅ
ଅଭିନନ୍ଦନ ସୁନାଝିଅ
ଜିଲ୍ଲା ମୟୂରଭଞ୍ଜ ରାଇରଙ୍ଗପୁର
ଆମ ଓଡ଼ିଶାର ମାଟି
ଗର୍ବିତ ଆଜି ସମଗ୍ର ଭାରତ
ସୁନାଝିଅ ରାଷ୍ଟ୍ରପତି ।
ପାହାଡ଼ର କନ୍ୟା ସେ ଟିକି ଝରଣା
ସୁବାସିତ ବଣମଲ୍ଲୀ
ଉତ୍ସର୍ଗ ନିଷ୍ଠାରେ ସୁବାସ ମହକେ
ବହେ ପ୍ରାଣୋଚ୍ଛ୍ୱାସ ତୋଳି ।
ଦାରିଦ୍ର୍ୟ କଷଣ ଶତ ବାଧାବିଘ୍ନ
କରି ସିଏ ଉଲ୍ଲଙ୍ଘନ
ହସାଇଛି ତୀରେ ସବୁଜ ସୁନ୍ଦର
ସ୍ୱନ କୁଳୁକୁଳୁ ସ୍ୱପ୍ନ ।
ସ୍ୱାଧୀନ ଭାରତେ ଜନ୍ମ ନେଇଥିବା
ଦୁହିତା ଦ୍ରୋପଦୀ ମୁର୍ମୁ
ଗିରିଜନ କୁଳ କରିଲେ ଉଜ୍ଜ୍ଵଳ
ଅଭିନନ୍ଦନୀୟ ଏଣୁ ।
ସହି ଦୁଃଖକଷ୍ଟ ଅରଜିଲେ ବିଦ୍ୟା
ମାଟିର ସାନ୍ତାଳୀ ଝିଅ
ଜୀବନ ସ°ଗ୍ରାମେ ହରାଇଲେ ସ୍ୱାମୀ
ଅକାଳରେ ଦୁଇପୁଅ ।
ରଖି ମନୋବଳ ଦୁର୍ଦ୍ଦିନ ସମୟେ
ଜୀବିକା ଅର୍ଜନ ପାଇଁ
ଅତି ସାଧାରଣ କର୍ମ ନିଯୁକ୍ତିରେ
ନଥିଲା ବି କୁଣ୍ଠା କାହିଁ ।
ପଚିଶି ବରଷ ରାଜନୀତି ସେବା
ପ୍ରଥମେ ସମିତି ସଭ୍ୟ
ଆଗକୁ ଆଗକୁ ଏମଏଲଏ ମନ୍ତ୍ରୀ
ହେଲେ ରାଜ୍ୟପାଳ ମଧ୍ୟ ।
ସ°ପ୍ରତି ସମାପ୍ତ ପଞ୍ଚଦଶତମ
ରାଷ୍ଟ୍ରପତି ନିର୍ବାଚନ
ଦେଶର ପ୍ରଥମ ନାଗରିକ ପଦ
କରିବେ ମୁର୍ମୁ ମଣ୍ଡନ ।
ଭଞ୍ଜ ମାଟି କନ୍ୟା ଦ୍ରୋପଦୀଙ୍କ ପାଇଁ
ଓଡିଶା ଗୌରବାନ୍ୱିତ
ରାଇସିନା ହିଲ୍ସ ସୃଜୁ ଇତିହାସ
ଜୀବନ ହେଉ ସାର୍ଥକ ।
ପ୍ରଚଳୁ ଜୀବନ ପ୍ରଗତିର ଚକ୍ର
ଗତି ଲଭୁ ନିଷ୍ପେସିତ
ହେଉ ତ୍ୱରାନ୍ୱିତ ସ୍ୱଚ୍ଛନ୍ଦ ସ୍ୱଚ୍ଛଳ
ଗଣତନ୍ତ୍ର ସୁରକ୍ଷିତ ।