ଅଭିମାନ ବୋଲି କିଛି
ଅଭିମାନ ବୋଲି କିଛି
ମନ ଦେଲି ମାନ ଦେଲି
ମୋହ ଦେଲି ଲୁହ ଦେଲି
ରଖି ଥିଲି ମିଛି ମିଛି
ଅଭିମାନ ବୋଲି କିଛି
ସେତକ ବି ଦେଇ ଦେଲି ବିନା ବାଧାରେ
ତଥାପି ବି ରହି ଗଲି ସେଇ ରାଧାରେ ।
କୁଳ ଭୁଆସୁଣୀ ହେଇ
କୁଳକୁ ଚାହିଁଲି ନାହିଁ
ତୁମକୁ ମୁଁ ଦେଲି ବାଛି
ଅଭିମାନ ବୋଲି କିଛି
ସବୁ ନିନ୍ଦା ସହି ଗଲି ବିନା ଦ୍ୱିଧାରେ
ତଥାପି ବି ରହି ଗଲି ସେଇ ରାଧାରେ ।
କଳଙ୍କ କଜ୍ଜଳ କଲି
ତୋ ପ୍ରେମ ଉଜ୍ଜଳ ବୋଲି
ମୋହ ମାୟା ଦେଲି ପୋଛି
ଅଭିମାନ ବୋଲି କିଛି
ଭାସି ଗଲି ତୋ ବଇଁଶୀ ସ୍ୱନ ସୁଧାରେ
ତଥାପି ବି ରହି ଗଲି ସେଇ ରାଧାରେ ।
ଯମୁନାକୁ ଧାଇଁ ଧାଇଁ
ଜଗତ ଚାହିଁଲି ନାହିଁ
ଅଭିମାନ ବୋଲି କିଛି
ସଂସାରକୁ କଲି ଛି ଛି
କଣ୍ଠସ୍ଥ ହେଲାନି ପ୍ରେମ ରହେ ମୃଧାରେ
ତଥାପି ବି ରହି ଗଲି ସେଇ ରାଧାରେ ।
ପତି ପୁତ୍ର ମୂର୍ଚ୍ଛି ଦେଇ
ଦୁଃଖ ସବୁ ଗଲି ପିଇ
ଅଭିମାନ ବୋଲି କିଛି
ଆଉ କିବା କୁହ ଅଛି
ପ୍ରୀତି ତୁମ ଥୋଇ ଦେଲି ନାକ ସିଧାରେ
ତଥାପି ବି ରହି ଗଲି ସେଇ ରାଧାରେ ।
ନିଜକୁ ମୁଁ କରେ ଘୃଣା
ହରେଇ ନିଜ ଠିକଣା
ଚନ୍ଦ୍ରସେଣା ପତି ଅଛି
ଅଭିମାନ ବୋଲି କିଛି
ବିକି ଦେଲି ଗୋପଦାଣ୍ଡେ ଦର ଅଧାରେ
ତଥାପି ବି ରହି ଗଲି ସେଇ ରାଧାରେ ।