ଆସିଗଲା ଦୀପାବଳୀ
ଆସିଗଲା ଦୀପାବଳୀ
ଆସିଗଲା ଦୀପାବଳୀ ଫୁଟାଇବା ବାଣ l
ବେଗିବେଗି ବଜାରରୁ ଯାଇ କିଣିଆଣ ll
ତେଲୁଣି ଚାଇନା କୁମ୍ପି ଲଙ୍କା ଚକ୍ରକେଳି l
ଝରା ବତୀ ଧପଧପି ରକେଟ ହାବେଳି ll
କୁକୁର ଲାଞ୍ଜରେ ବାନ୍ଧିଦେବ ଝରାବତୀ l
ତାଳି ମାରି ପିଲାଙ୍କର ଖୁସି ହେବ ଅତି ll
ସାବଧାନେ ଦୂରେ ରହି ବାଣ ଫୁଟାଇବ l
ମଜା ହେବ ଅଗ୍ନିଭୟ ପ୍ରମାଦ ନହେବ ll
ଦୀପାଵଳୀ ନ ଛୁଇଁବେ ଜମାରୁ ଆଇଁଷ l
ପିତରଗଣେ ଲଭିବେ ନରକରେ ବାସ ll
ଧନତେରସରେ ସଭାଜନେ ବାଣୀ ଶୁଣ l
ଘରେ ନକରିବ ଭାଇ ଜମା ରାମାୟଣ ll
ବାଣ ଫୁଟା ସରି ଗଲେ ପିତୃଙ୍କୁ ପୂଜିବ l
କାଉଁରିଆ ଜାଳି ପୁଣି ପିପେଇ ଡାକିବ ll
ବଡ଼ବଡୁଆ ହେ ଆସ ଅନ୍ଧାରରେ ଆସ l
ଆଲୁଅରେ ଯାଇ କର ଵଇକୁଣ୍ଠ ବାସ ll
ଗଙ୍ଗାଯିବ ଗୟା ଯିବ ପୃଷୋତ୍ତମ ଯିବ l
ବାଇଶିପାହାଚେ ଯାଇ ଗଡ଼ ଗଡ଼ାଇବ ll
ଦୀପାବଳି ପର୍ବ ଏବେ ସମାପନହେଲା l
ଗୀତଦୁଇପଦ ଲେଖି ଅର୍ଜୁନୀ ଗାଇଲା ll
ପଞ୍ଚୁକ ଆସୁଛି ସାଥେ ବୋଇତର ଭସା l
ଆ କା ମା ଵୈ ଉତ୍କଳସାଧବେ ଭରସା ll
ବଡ଼ଓଷା ସାଥେ ଅଛି ପୁଣି ଯାତ୍ରା ବାଲି l
କାର୍ତ୍ତିକେଶ୍ୱରଙ୍କ ପୂଜା ପୂଜା ମହାକାଳୀ ll
ଉତ୍କଳର ସଙ୍ଗେ ଭାଇ କେହେବ ସମର୍ଥ l
ନୀଳାଚଳେ ବିଜେ ମହାପ୍ରଭୁ ଜଗନ୍ନାଥ ll