ଲାଇବ୍ରେରୀ
ପ୍ରୋଫାଇଲ୍
ଆସ ଜାଣିବା ଓଡିଶା କଥା
ଆସ ଜାଣିବା ଓଡିଶା କଥା
ଆସ ପିଲାଏ ଜାଣିବା ଆମେ
ଆମ ଓଡିଶା ଖ୍ୟାତି
ମଧୁସୂଦନ ଗୋପବନ୍ଧୁ ଯେ
କବି କୁଳର ବତୀ।୧।
ନଦୀ ଭିତରେ ମହାନଦୀ ଯେ
ବହୁଛି ମନ ଜାଣି
ହ୍ରଦେ ଚିଲିକା ସାର ଯେ ପୁଣି
ନିଅଇ ମନ କିଣି।୨।
ପର୍ବତ ମଧ୍ୟେ ଶ୍ରେଷ୍ଠ ଅଟଇ
ଆମରି ଦେଓମାଳି
ପାରାଦ୍ବୀପ ଯେ ବନ୍ଦରେ ସାର
ଲାଗେ ଜାହାଜ ଭେଳି ।୩।
ପୋଷାକ ମଧ୍ୟେ ଜାତୀୟ ଅଟେ
ଆମରି ଗାନ୍ଧୀ ଖଦି
ଚାନ୍ଦୁଆ ପାଇଁ ପିପିଲି ସାର
ମନକୁ ଯାଏ ଭେଦି ।୪।
ଶିମିଳିପାଳ ସବୁଜ ଘର
ଜଙ୍ଗଲ ମଧ୍ୟେ ସାର
ଶୋଭାବନ ନନ୍ଦନ କାନନ
ପଶୁ ପକ୍ଷୀଙ୍କ ଘର ।୫।
ଶିରୀକ୍ଷେତର ବଡଠାକୁର
ସାରା ବିଶ୍ବରେ ଖ୍ୟାତ
କୋଣାରକ କାରୁକାର୍ଯ୍ୟ ଦେଖି
ଜଗତ ଆଚମ୍ବିତ।୬।
ଓଡିଶୀ ନୃତ୍ୟ ଦେଶେ ବିଦେଶେ
ବଢାଏ ଆମ ଗର୍ବ
ଦୋଳ ପୁଣି ରଜ ଦଶହରା
ପାଳୁରେ କେତେ ପର୍ବ ।୭।
ଆମେ ଓଡିଆ ଭାଷା ଓଡିଆ
ଶ୍ରେଷ୍ଠ ଓଡିଆ ବୀର
ସଭିଏଁ ଆମେ ଭାଇ ଭଉଣୀ
ଗରବ ଓଡିଶାର।୮।
