ଆସ ଆଉଥରେ ମୂଳରୁ ବଞ୍ଚିବା

ସମୟଟା ସାୟଂ କାଳରେ ଉପନୀତ ହେଲାଣି

ସୂର୍ଯ୍ୟଙ୍କ ଉଦୟ ଅସ୍ତକୁ ଅଟକେଇ ବି ହେଲାନି 

ତୁମେ ସୂର୍ଯ୍ୟକୁ କୁହ ମୁଁ ସମୟକୁ କହୁଛି 

ଈଶ୍ୱରଙ୍କ ପ୍ରଦତ୍ତ ଏ ଜୀବନକୁ

ଚାଲ ଆଉଥରେ ମୂଳରୁ ବଞ୍ଚିବାକୁ ଲାଗିବା।

ନୂଆକରି ଜୀବନରେ ଯେତେସବୁ ଦାୟିତ୍ୱ

କିଛି ତୁମ ଭାଗରେ 

କିଛି ମୋ ଭାଗରେ 

ବେଶୀ କମ୍ ନୁହଁ ସମାନ କି ବାଣ୍ଟିବା 

ଚାଲ ଆଉ ଥରେ ମୂଳରୁ ବଞ୍ଚିବାକୁ ଲାଗିବା ।

ବ୍ୟସ୍ତତାର ନିକିତିରେ ଉପର ତଳ ନୁହଁ 

ସମାନ୍ତରାଳ ଭାବେ ସମୟକୁ ମାପିବା 

ଚାଲ ଆଉଥରେ ମୂଳରୁ ବଞ୍ଚିବାକୁ ଲାଗିବା ।

କର୍ମମୟ ଜୀବନରୁ ଫୁରସତ ମିଳିଲେ, 

ଦୁହେଁ ମୋବଇଲରେ ନ ଲାଗି 

ନିଜନିଜର ସୁଖ ଦୁଃଖ ବୁଝିବା 

ଚାଲ ଆଉଥରେ ମୂଳରୁ ବଞ୍ଚିବାକୁ ଲାଗିବା।

କେବେ କଥା କଟାକଟି ଅବା ଯୁକ୍ତିତର୍କ ପରେ 

ଅଭିମାନର ଅଲିଭା ଦାଗକୁ 

ସାଙ୍ଗ ହୋଇ ପୋଛିବା 

ଚାଲ ଆଉଥରେ ମୂଳରୁ ବଞ୍ଚିବାକୁ ଲାଗିବା।

ଜୀବନର ଏ ଜଞ୍ଜାଳମୟ ପୁସ୍ତକରୁ

କରିଥିବା ସେ ଭୁଲ ସବୁକୁ

ତୁମେ କିଛି ଲିଭେଇବ

ମୁଁ କିଛି ଲିଭେଇବି

ନୂତନ ଏକ ପୁସ୍ତକ ରଚିବା

ଚାଲନା...

ଜୀବନକୁ ଆଉଥରେ ମୂଳରୁ ବଞ୍ଚିବାକୁ ଲାଗିବା ।।