ଆମେ ଯେ ବୀର ଜାତି

ନିର୍ଭୀକ ଆମେ ସାହସୀ ଆମେ

ଆମେ ଯେ ବୀର ଜାତି

ଶତ୍ରୁ ଆଗରେ ଯୁଦ୍ଧ କ୍ଷେତ୍ରରେ

ପତାଇ ଦେଉ ଛାତି

ସଦଭାବନା ଶାନ୍ତି କାମନା

ଜୀବନେ ମୁଖ୍ୟ ରୀତି

ପଛଘୁଞ୍ଚାକୁ କରୁଛୁ ଘୃଣା

ହଟାଇ ମନୁ ଭୀତି

ଅନ୍ୟାୟ ଦେଖି ବିରୋଧ କରୁ

ସହୁନୁ ମଥାପାତି

ସତ୍ୟ ପଥରେ ଚାଲୁଛୁ ସଦା

ଆମେ ଦିବସ ରାତି

ଧର୍ମକୁ ବରି କରମ କରି

ବଢ଼ାଉ ଆମ ଗତି

ବିନା କାରଣେ ଦେଲେ କେ ବାଧା

ରକତ ଯାଏ ତାତି

କିଏ ବା ଯଦି ହିଂସା ଆଦରି

କରଇ ଆମ କ୍ଷତି

ଦୃଢ଼ ହସ୍ତରେ ଦମନ କରୁ

ଯାଏନା ଜମା ବର୍ତ୍ତି

ସ୍ଵଛ ସରଳ ମନ ଆମର

ଈଶ୍ୱର ପ୍ରେମ ଶକ୍ତି

ନିଖୁଣ କରି ଗଢି ତୋଳିଛୁ

ଅନେକ କଳାକୀର୍ତ୍ତି

ହୃଦରେ ଆମ ଭରି ରଖିଛୁ

ଅମୂଲ୍ୟ ଦେଶପ୍ରୀତି

ଅହିଂସା ମନ୍ତ୍ର କରୁଛୁ ଗାନ

ଏକତା ଆମ ଶକ୍ତି

ପରାଧୀନତା ହଟାଇ ଦେଇ

ଗାଉଛୁ ମୁକ୍ତିଗୀତି

ବୀରତ୍ୱ ଆମ ମାନ ସମ୍ମାନ

ଆମେ ଯେ ବୀରଜାତି