ଆମେ କରୁଅଛୁ ଆମ ଶାସନ

ଆମରି ଏ ଦେଶ ଅଟେ ଭାରତ

ଯଶ କୀର୍ତ୍ତୀ‐ଯାର ଅଟେ ଅଶେଶ ।

ସୁପ୍ରାଚୀନ ତମ ଗୌରବ ‐ମୟୀ

ଜ୍ଞାନ‐ବିଜ୍ଞାନ ର ବିଭା କୁ ବହି ।

ନବୀନ ଚେତନା ତୁଙ୍ଗ ରହସ୍ଯ

ଧରି ଶୋଭୁ ଅଛି ଆମରି ଦେଶ ।

ଆମେ ଏବେ ହୋଇ ଅଛୁ ସ୍ବାଧୀନ

ନିଜେ କରୁ ନିଜ ଦେଶ ଶାସନ ।

ଭୋଟ ଅଧିକାର ଅଛି ଯାହାର

ଭୋଗ ଅବାଧରେ କରେ ନୋଟର ।

ଭୋଟ ଦେଇ ଆମେ ବାଛୁଛୁ ନେତା

ପଞ୍ଚୁ, ଏମେଲେ ,ମନ୍ତ୍ରୀ, ଏମ୍ପି, କଥା ।

କହନ୍ତି ଆମର ସଭାରେ ଯାଇ

ବିଧାନ ଗଢନ୍ତି ସେହି ମାନେହିଁ ।

ପାଲିଆ ମେଣ୍ଟାରୀ ଶାସନ ଆମ

ପ୍ରଧାନ ମନ୍ତିରୀ କରନ୍ତି କାମ ।

ଦେଶ ପାଇଁ ହୁଏ ନାନା ଯୋଜନା

ଦେଶ ସେବା ପାଇଁ ସମାଲୋଚନା ।

କରାହୁଏ ନେତା ‐ମନ୍ତ୍ରୀଙ୍କ କାମ

ନେତା କାମ କଲେ ଦଳ ସୁନାମ ।

ଇନ୍ଦିରା‐ଆବାସ ,ଭାତିଆ ଟଙ୍କା

କଣ୍ଟ୍ରୋଲ‐ ଚାଉଳ ହୁଅଇ ବଣ୍ଟା ।

ନେଇ ଆଣି ଥୋଇ ପାରିଲେ ଯାଇ

ଚୋରୀ ‐ବିଦ୍ଯା ସବୁ ଭଲ ଲାଗଇ ।

ଟଙ୍କା ଲାଗି କରି ଟାଉଟରୀ କାମ

ଦିଆଯାଏ ତାକୁ ନୌକରୀ ନାମ ।

ଅଗା‐ବଗା‐ଖଗା‐ ହାତେ ଶାସନ

ଭାର ଦେଇ ଆମେ ଅଟୁଁ ସ୍ବାଧୀନ ।

ଆମେ କରୁଅଛୁ ଆମ ଶାସନ

ଦେଇ ପାରେ ଯିଏ ଭଲ ଭାଷଣ ।

ନେତା ଭାବେ ତାକୁ ନିରିବାଚନ

କରୁ ଭୋଟ ଦେଇ ଆମ ଶାସନ ।

ପାଇଁ ତା' କର ରେ ଦେଶର ଭାର

ଦେଇ ନେତା ବାଛି ଆମ ନାଅଆର ।

ମଙ୍ଗୁଆଳ କରି ତାହାକୁ ଗଢୁ

ଖୁଆଉ ତାହାକୁ ଦିଲ୍ଲୀକା ଲଡୁ ।

ପାଞ୍ଚ ବର୍ଷେ ଥରେ ନିରିବାଚନ

ଜିଣନ୍ତି ତହିଁରେ ଶାସକ ଗଣ ।

ବିଧାନିଆ ସାଜି ରାଜଧାନୀରେ 

ବସି ସେ ଶାସନ୍ତି ଆମ୍ଭଙ୍କୁ ଧୀରେ ।

ପାଷଣ୍ତ ଜନଙ୍କୁ ଦ୍ଯନ୍ତି ଅଭୟ

ବୋଲନ୍ତି ରେ ମତ ଆମ୍ଭଙ୍କୁ ଦିଅ ।

ଦାଦା ଦାଗୀ ଙ୍କୁ ସେ ପୋଷି ଥାଆନ୍ତି

ଅର୍ଦ୍ଧ‐ରାତ୍ରୀରେ ଧନ ରତନ ଦ୍ଯନ୍ତି ।

ମାମୁଁଙ୍କୁ ଲଗାଇ ଜନେ ଡରାନ୍ତି

ଖୁଆଡରେ ଖୁନ୍ଦି ଖାସି ଖୁଆନ୍ତି ।

ଶୁଖୁଆ ଖିଆ କୁ ଖାସି ସୁଆଦ

ଚଖାଇବା ପରି ତାହାଙ୍କୁ ଗଦ ।

ଶୁଂଘାଇ କରନ୍ତି ନିଜ ଅଧିନ

ବସିଲେ ଯାଇକି ସିଂହ ଆସନ ।

ଶାସକ ଦଳିଆ ଦେଶ ଶାସନ

ସବୁଦିନ କରି ଥାନ୍ତି ଏସନ ।

କଉଶଳ ଆଉ ଉପାୟ କରି

ବିରୋଧ କରିଲେ ଖୁଆଡେ ଭରି ।

ଖୁଆନ୍ତି ଆମକୁ ପଲାଉ ଖାସି

ଭୋଟ ନେବା ପାଇଁ କରନ୍ତି ଖୁସି ।

ଶାସନ ପାଇଁ କି ଶିକ୍ଷା‐ଯୋଗ୍ଯତା

କିଛି ନାହିଁ ଯେ ଖାଲି ହେଲେ ନେତା ।

ଶାସିବୁ ଦେଶକୁ ଆପଣା କରେ 

ଦକ୍ଷ ଯେଉଁ ମାନେ ମାଡ‐ପିଟରେ ।

ଓସ୍ତାଦ ଯେ କଳି‐ମାଡ‐ଗୋଳ ଦଙ୍ଗା

ପିଟି ପାରେ ଲୋକଙ୍କୁ ଧରି ଠେଙ୍ଗା ।

ତୁଳସୀ ପତରୁ ବାସିବା ପରି

ଶାସକ ମାନଙ୍କୁ ହୁଅଇ ବାରି ।

ଆମେ କରୁ ଅଛୁ ଆମ ଶାସନ

ଆମରି ଭାରତ ଅଟେ ମହାନ ।