ଆମେ ବି ଗଢିବୁ ଦେଶଟିଏ

ଆଜି ଆମେ ସବୁ ଅଛନ୍ତିରେ ଶିଶୁ

  କାଲିକୁ ଯେ ବଡ ହେବା 

ମାଆର ମମତା ସ୍ନେହ ଆଦରକୁ 

  କେବେ ହେଲେ ନ ଭୁଲିବା ।

ଜନନୀ ଜନ୍ମଭୂମି ଓ ମାତୃଭାଷା

  ଶିଖାଇବ ସବୁ କଥା

ଭଲ ପାଠ ଭଲ ସଂସ୍କାର ସଂସ୍କୃତି

  ଟେକ କରିବରେ ମଥା ।

କୁନି ବିଶ୍ଵକର୍ମା ସାଜିଣ ଆମେରେ

  ଗଢ଼ିବା ନୂଆ ଭାରତ

ବିଶ୍ୱବାସୀ ଆମ କାର୍ଯ୍ୟକ୍ରମ ଦେଖି

  ହୋଇ ଯିବେରେ ଚକିତ ।

ଛୋଟ ଅଗ୍ନିଶିଖା ଯେପରି ଜଗତେ

  ବିସ୍ତାର କରି ପାରଇ

କୁନି ପ୍ରତିଭାକୁ ବିଶ୍ୱ ଦରବାରେ

  ସ୍ଥାପନା କରିବା ଭାଇ ।

ଛୋଟ ଜଳ ବିନ୍ଦୁ ହୋଇ ଆମେ

  ମହାସିନ୍ଧୁ ଟିଏ ଯିବା ହୋଇ

ଆଜି ଯେ ଆମକୁ ଛୋଟ ଭାବୁଛନ୍ତି

  କାଲି କରିବେ ବିଜୟୀ ।

ଏକ ଏକ ଫୁଲେ ଯେଉଁ ପରି ଏକ

  ମାଳା ହୁଅଇ ପ୍ରସ୍ତୁତ

ଏକ ଦିବ୍ୟ ମାଳା ହୋଇ ଯେ ବିଶ୍ୱକୁ

  କରି ଦେବା ସୁରଭିତ ।

ଧରମା ବାଜିକୁ ଆଦର୍ଶ କରିବା

  ଶତ୍ରୁକୁ ହତ କରିବା

ପାହାଡ ଚଢି ଓ ବନ୍ଧୁକ ଧରିଣ

  ରକ୍ଷା ପ୍ରହରୀ ସାଜିବା ।

ଡାକ୍ତର ବୈଜ୍ଞାନିକ ଓ ଅଧ୍ୟାପକ

  ଦେଶ ମାତୃକାର ସେବା

ମାନବ ସେବାକୁ ମାଧବଙ୍କ ସେବା

  ଜ୍ଞାନ ଆମେ ଆଚରିବା ।

ଆମରି ଭିତରେ ସୁପ୍ତ ସିଂହ ଅଛି

  କରିବା ତାକୁ ଜାଗ୍ରତ

ଅଜ୍ଞାନ ଅଶିକ୍ଷା ଅନ୍ଧ ବିଶ୍ୱାସକୁ

  କରିବାରେ ଦୂରୀଭୂତ ।

ସତ୍ୟ ଶାନ୍ତି ଦୟା କ୍ଷମା ଓ ନମ୍ରତା

  ହେବ ଆମର ଭୁଷଣ

ଅନ୍ୟାୟ ଅନୀତି ବିରୁଦ୍ଧରେ ସ୍ୱର

  କରିବାରେ ଉତ୍ତୋଳନ ।

ଧ୍ଵଂସ ହେଉଅଛି ଆମ ପରିବେଶ

  ବଢୁଅଛି ପ୍ରଦୂଷଣ

ଲଗାଇବା ଗଛ ରହିବାରେ ସ୍ୱଚ୍ଛ

  ସ୍ୱଚ୍ଛ ଭାରତ ଗଢ଼ିଣ ।

କମ୍ପ୍ୟୁଟର ଯୁଗ ପିଲା ଆମେ ନୂଆ

  ଉଦ୍ଭାବନ ଆବିଷ୍କାର

ଦେଶରେ ଶିଳ୍ପ କାରଖାନା ବସାଇ

  ଅଭାବ କରିବା ଦୂର ।

ଆମ ଭାଇମାନେ ବିଦେଶକୁ କେହି

  ଯିବେନି ଦାଦନ ଖଟି

ନୂଆ ଇତିହାସ ରଚିବାରେ ଆମେ

  ସର୍ବେ ରହିଲେ ଏକାଠି ।