ଆମ ସୁପରମ୍ୟାନ୍
ଆମ ସୁପରମ୍ୟାନ୍
ଯାଇଥିଲି ଦିନେ ସଞ୍ଜବେଳଟାରେ
ଧାନ କ୍ଷେତ ଆଡେ ବୁଲି
ବରଷ ଯାକର ସୁନାର ଫସଲ
ସୁରକ୍ଷିତ ହେବ ବୋଲି ||
ଦୂରରୁ ଶୁଣିଣ ପଶୁଙ୍କ ଶବଦ
ମନେ ମୁହିଁ ସ୍ଥିର କଲି
ଗଛର ଡାଳରେ ମଞ୍ଚର ଭିତରେ
ରହି ମୁଁ ଜଗିବି ବୋଲି ||
ବିଭାବରୀ କ୍ରମେ ହେଲା ଅଗ୍ରସର
ନିଃଶବ୍ଦ ହେଲା ଧରଣୀ
ଜହ୍ନ ତାରା ମେଳେ ଆକାଶ ପଥରେ
ଆସି ରଚିଲା ରୋଷଣୀ ||
ଏହି ସନ୍ଧି କ୍ଷଣେ ଦେଖିଲି ଗଗନେ
ଅତି ଉଜ୍ୱଳ ଆଲୋକେ
ଉଦ୍ଭାସିତ କରି ଓହ୍ଲାଇ ଆସିଲା
ବ୍ୟୋମଯାନ ସେ ମୁଲକେ ||
କବାଟ ଖୋଲିଣ ବାହାରି ଆସିଲେ
ନର ନାରୀ ଦୁଇଜଣ
ଭୂମି ପରେ ରଖି କଅଁଳା ଶିଶୁଟେ
କରିଲେ ପ୍ରତ୍ୟାଗମନ ||
ଯାନ ଚାଲିଗଲା ଆକାଶ ମାର୍ଗରେ
କିଛି ମୁହୂର୍ତ୍ତ ମଧ୍ୟରେ
କଅଁଳା ଶିଶୁର କ୍ରନ୍ଦନ ଶୁଣି ମୁଁ
ପହଞ୍ଚିଲି ଯାଇ ଖରେ ||
ଆଠ ବରଷର ଦାମ୍ପତ୍ୟ ଜୀବନେ
ନିଃସନ୍ତାନ ଥିଲି ମୁହିଁ
ତେଣୁ ମୁଁ ଆନନ୍ଦେ ପାଳିଲି ତାହାକୁ
ସେଦିନୁ ଘରକୁ ନେଇ ||
ଚନ୍ଦ୍ରକଳା ପରି ବଢିଲା ସେ ଶିଶୁ
ବିଦ୍ୟାଳୟେ ଗଲା ସିଏ
ଅସାଧାରଣ ସେ ବିଦ୍ୟା ଓ ବୁଦ୍ଧିରେ
ନଥିଲା ତା ସରି କିଏ ||
ଆଠ ବରଷର ହୋଇଥିବା ବେଳେ
ଅଝଟ କରିଣ ଦିନେ
ମୋ ସାଥିରେ ଗଲା ଧାନ ଜଗିବାକୁ
ସିିଏ ସେହି ସନ୍ଧିକ୍ଷଣେ ||
ନିଶାର୍ଦ୍ଧ ହୁଅନ୍ତେ ବଣୁଆଁ ହାତୀଟେ
ଧାନକ୍ଷେତକୁ ଆସିଲା
ପାଚିଲା ଧାନକୁ ଖାଇବାର ଦେଖି
ତା ପାଖକୁ ମାଡି ଗଲା ||
ହାତୀର ଶୁଣ୍ଢକୁ ଶକ୍ତ ଚାପୁଡାଟେ
ମାରିଦିଅନ୍ତେ ସେ ପିଲା
ଚିତ୍କାର କରିଣ ସେହି ସ୍ଥାନ ଛାଡି
ଦ୍ରୁତବେଗେ ପଳାଇଲା ||
ମୋ ଘରକୁ ଦିନେ ଚୋର ପଶି ଗୁଳି
ତା ଦେହକୁ ମାରି ଦେଲା
ଗୁଳି ଫେରିଯାଇ ଚୋରକୁ ମାରିଲା
ମୋ ପୁଅ ଅକ୍ଷତ ଥିଲା ||
ଏହିପରି କେତେ ବିପଦ ଆପଦୁ
ସିଏ ରକ୍ଷା କରୁଥିଲା
ସଭିଙ୍କର ଦ୍ୱାରା ସୁପରମ୍ୟାନ୍ ବୋଲି
ବୋଲାଇଲା ସେହି ପିଲା ||
ଗ୍ରାମ ବିଦ୍ୟାଳୟୁ ପାଠ ପଢା ସାରି
ସହରକୁ ସିଏ ଗଲା
ସାମ୍ବାଦିକତାର ଡିଗ୍ରୀ ଲାଭ କରି
ସାମ୍ବାଦିକତା ସେ କଲା ||
ଅନ୍ୟାୟ ଅନୀତି ଶୋଷଣ ବିରୁଦ୍ଧେ
ସଂଗ୍ରାମ ଜାରି ରଖିଲା
ସତ୍ୟ ଖବରର ପ୍ରକାଶ କରିଲା
କାହାକୁ ଡରୁ ନଥିଲା ||
ଦୁର୍ନୀତିଖୋରର ମୁଖା ଖୋଲିଦେଲା
ଗୁଣ୍ଡାଙ୍କୁ ଦମନ କଲା
ନିରୀହ ଜନତା ପାଖରେ ପହଞ୍ଚି
ଅତ୍ୟାଚାର ଲୋପ କଲା ||
ଯେଉଁଠି ଶୁଣିବ ସୁପର ମ୍ୟାନର
ଚାଲିଥାଏ ଗୁଣଗାନ
କୌଣସି ଅସ୍ତ୍ରରେ ହତ ହୁଏ ନାହିଁ
ସେତ ଥିଲା ଆୟୁଷ୍ମାନ ||
ଅନ୍ୟ ଗ୍ରହର ସେ ମଣିଷ ଅଟଇ
ସୁପରମ୍ୟାନ୍ ପୁଅ ଆମ
ଗୁଣ୍ଡା ଚୋର ଖଣ୍ଟ ଦୁର୍ମତି ଜନର
ଅଟେ ଜାଣ ସିଏ ଯମ ||