STORYMIRROR

Kunja Bihari Dalai

Inspirational

3  

Kunja Bihari Dalai

Inspirational

ଆମ ଭାଷା ଆମ ମାଆ ପରି

ଆମ ଭାଷା ଆମ ମାଆ ପରି

1 min
224


ଜନମିଲି ଯେବେ ଜନନୀ ଜଠରୁ

ଶୁଣିଲି ମୁଁ ଯେଉଁ ଭାଷା 

ମାଆ ପରି ମୋତେ ଲାଗିଲା ନିଜର

ସେପରା ମୋ ମାତୃଭାଷା ।


ତାହାରି ଆଦର ଯତ୍ନରେ ବଢିଲି

ଶିଖିଲି ଅନେକ କଥା 

ସମାଜେ ପ୍ରତିଷ୍ଠା ପାଇଲି ତା'ପାଇଁ

ଚାଲୁଅଛି ଟେକି ମଥା ।


ମାତୃଭାଷା ଟେକ ରଖିବାକୁ କେତେ

ସୁପୁତ୍ର ମାତୃଭୂମିର 

କବିତା ପ୍ରବନ୍ଧେ ଲେଖିଗଲେ ଗାଥା

ଏବେ ବି ତାହା ଅମର ।


ଫକୀର ମୋହନ ଗୋପବନ୍ଧୁ ପୁଣି

ଉପେନ୍ଦ୍ର ସାରଳା ଦାସ 

ରାଧାନାଥ ରାୟ ଜଗନ୍ନାଥ ଦାସ

ପଣ୍ଡିତ ଗୋଦାବରୀଶ ।


ମାତୃଭାଷା ମାନ ବଢାଇବା ପାଇଁ

କଲେ ଜୀବନ ଉତ୍ସର୍ଗ 

ତାଙ୍କ ପର ପିଢ଼ି ରୂପରେ ଜନ୍ମିଛୁ

ଏହାତ ଆମ ସୌଭାଗ୍ୟ ।


ମାଆ ପରି ଆମ ଅଟେ ମାତୃଭାଷା

ତାପାଇଁ ଆମେ ଗର୍ବିତ 

ମୋ ଜାତି ଓଡ଼ିଆ ମୋ ଭାଷା ବଢ଼ିଆ

କା' ପାଶେ ହେବୁନି ନତ ।


ଆମ ଭାଷା ଆମ ବଡ଼ ପରିଚୟ

ଚିହ୍ନା ଦେବାପାଇଁ କା'ରେ 

ଆମ ଭାଷା ମାନ ରଖିବୁ ଅକ୍ଷୁର୍ଣ୍ଣ

ଭୁଲିବୁନି କା'କଥାରେ ।



Rate this content
Log in

Similar oriya poem from Inspirational