ଆକାଶ

ହେ' ଆକାଶ କି ଶବଦେ

କରିବି ବର୍ଣ୍ଣନ,

ତମ୍ଭେହିଁ ଅବର୍ଣ୍ଣନୀୟ

ଶବ୍ଦର ମାଧ୍ୟମ ।

କିଏ ତୁମ୍ଭ ସୃଷ୍ଟିକର୍ତ୍ତା 

ଅନନ୍ତ କକ୍ଷର ?

କିବା ସ୍ଵୟଂ ପରଂବ୍ରହ୍ମ 

ପରମଇଶ୍ବର।୧।

ବେଦ ବିଜ୍ଞାନ ବର୍ଣ୍ଣିତ 

ତଥ୍ୟ ପ୍ରମାଣିତ,

ଆକାଶ ପଞ୍ଚତତ୍ତ୍ବର

ଆଦିମୂଳ ସ୍ରୋତ ।

ଧରତି ଜଳ ଅନଳ

ଅନିଳ ସହିତ,

ଜୀବନର ସଞ୍ଚରଣ

ଜଗତ ଜୀବନ୍ତ ।୨।

ଅଗଣିତ ସୂର୍ଯ୍ୟ ଚନ୍ଦ୍ର

ଜ୍ୟୋତିପୁଞ୍ଜ ତାରା,

ତା' ମଧ୍ୟେ କନ୍ଦୁକ ପ୍ରାୟ 

ପରିମିତ ଧରା ।

ବେଦରେ ବର୍ଣ୍ଣନା ନାହିଁ

ତୁମ୍ଭ ଦୈର୍ଘ୍ୟ ପ୍ରସ୍ଥ,

ଶୂନ୍ୟ ପ୍ରାୟ ଅନ୍ତହୀନ 

ଆକାଶ ଅନନ୍ତ।୩।

ହେ ଅନନ୍ତ ! 

ବିସ୍ମୟ ଆନନ୍ଦ ସୁଖ

ସୂଚକ ଅବ୍ୟୟ,

ତୁମେ ବ୍ରହ୍ମା ବିଷ୍ଣୁ ରୁଦ୍ର

ସୁମଗଂଳମୟ ।

ଅକଳନ ବିଶ୍ବ ତୁମ୍ଭ

ଗର୍ଭେ ସମାହିତ,

ଅନୁମେୟ ନୁହେଁ ତୁମେ

ମୋ ପାଇଁ ଅନୁକ୍ତ।୪।

    ****