ଆଜିକାଲି କାହିଁ ଭଲଲାଗେ ମୋତେ
ଆଜିକାଲି କାହିଁ ଭଲଲାଗେ ମୋତେ
ଆଜିକାଲି କାହିଁ ଭଲ ଲାଗେ
ବରଷାର ରିମ୍ ଝିମ୍ ଝଙ୍କାର
ଭିଜିବାକୁ ମନ ଟାଣିନିଏ ମୋତେ
ପାଦ ହୋଇଥାଏ ନୃତ୍ୟେ ବିଭୋର ।
ଆଜିକାଲି କାହିଁ ଭଲଲାଗେ ମୋତେ
କୋଇଲିର କୁହକୁହୁ ସଙ୍ଗୀତ
ଫଗୁଣ ରଙ୍ଗରେ ରଙ୍ଗୀନ ମନ ମୋ'
ନିତି ଖୋଜୁଅଛି ମଧୁ ବସନ୍ତ ।
ଆଜିକାଲି କାହିଁ ଭଲଲାଗେ ମୋତେ
ବନ ଉପବନେ ଫୁଲ ସମ୍ଭାର
ପବନେ ବିକ୍ଷିପ୍ତ ସୁଗନ୍ଧ ମୋହୁଛି
ତା'ସାଥେ ବିତୁଛି ଦିନ ମୋହର ।
ଆଜିକାଲି କାହିଁ ଭଲ ଲାଗେ ମୋତେ
ସାଗରର ନୀଳ ନୀଳ ଲହରୀ
ବେଳାତଟେ ବସି ବାଲିଘରଟିଏ
ଗଢିବାକୁ ଇଚ୍ଛା ଦିବା ଶର୍ବରୀ ।
ଆଜିକାଲି କାହିଁ ଭଲ ଲାଗେ ମୋତେ
ପୁନେଇଁ ଜହ୍ନର ସ୍ନିଗ୍ଧ ଜୋଛନା
ନିର୍ଜନ ରାତିରେ ମନ ଆକାଶରେ
ଉଙ୍କିମାରୁଥାଏ କେତେ ଭାବନା ।
ଆଜିକାଲି କାହିଁ ଭଲଲାଗେ ମୋତେ
ଗପିବାକୁ ତୁମ ସାଥେ ଅନେକ
ଆଖିରେ ଆଖିଏ ସପନ ସଜେଇ
ଦେଖୁଥାଏ ତୁମ ମିଠା ଝଲକ ।