ଆଜିକାଲି ଛୁଆ ବଡ଼ ଅମାନିଆଁ

ଆଜି କାଲି ଛୁଆ ବଡ଼ ଅମାନିଆଁ     

    କାହା କଥା ଶୁଣୁନାହାନ୍ତି     

ମୂଷା ଲାଞ୍ଜ ଭଳି ଚୁଟି ଗଣ୍ଡେ ରଖି

    ନିଜକୁ ହିରୋ ଭାବନ୍ତି

ଓଜନ କରିଲେ ଦଶ କେଜି ହେବେ

    ନିଜକୁ ଭାବନ୍ତି ବଳୁଆ

ବାଇକି ଗୋଟିଏ ହାତେ ପଡିଗଲେ

    ଚଲାନ୍ତି ପବନ ଭଳିଆ

ପାଠ ପଢ଼ା ସବୁ ଚୁଲିକି ଗଲାଣି

    ନିଜକୁ ଭାବନ୍ତି ଜ୍ଞାନୀ

ଗୁରୁଜନ ସଙ୍ଗେ ଯୁକ୍ତି କରୁଥାନ୍ତି

    ସତେ ଅବା ମହାଜ୍ଞାନୀ

ଗୋଟିଏ ହାତରେ ରବରର ବଳା

     ଦିଶୁଥାଏ ଚୁଡି ଭଳିଆ

ଗୋଟିଏ କାନରେ କାନଫୁଲ ଥାଏ

     ଚୁଟି ଥାଏ କେରେକେରିଆ

ଅଣ୍ଟାର ତଳକୁ ପେଣ୍ଟକୁ ପିନ୍ଧି

    ଚାଲୁଥାନ୍ତି ଘୋଡା ଭଳିଆ

ପେଣ୍ଟ ସିଟଟା ଆଣ୍ଠୁ ଯାଏଁ ଥାଏ

     ଦିଶୁଥାଏ ଢଳଢଳିଆ

କାମଦାମ କିଛି ନଥାଏ ତାଙ୍କର

     ସର୍ବଦା ବ୍ୟସ୍ତ ରୁହନ୍ତି

ଗାଡି ଖଣ୍ଡେ ଧରି ଛକରୁ ଛକକୁ

     ଫଟକାର ଭଳି ବୁଲନ୍ତି

ବାପାଙ୍କ ପଇସା ଉଡେଇଦିଅନ୍ତି

     ପାଠକୁ ପଛରେ ପକାଇ

ସମୟ ସରିଲେ ବେଳ ବୁଡ଼ିଗଲେ

      କହନ୍ତି ଭାଗ୍ୟରେ ନାହିଁ