ଆଜି କି କରିଛି ପାପ
ଆଜି କି କରିଛି ପାପ
ବାଲକୋନୀରେ ଏକା ଠିଆ ମୁଁ ହୋଇଛି
ତମେ ବସି ଅଛ ଘରେ
ବିତି ଯାଏ ଦିନ ପାହିଯାଏ ରାତି
ତମ କଥା ଭାବି ଝୁରେ ll 1
ବଢାଇଲେ ହାତ ଛୁଇଁ ପାରେ ନାହିଁ
ତମ ସେ ଗୋଲାପି ଓଠ
ବଢଇ ଯନ୍ତ୍ରଣା ହୃଦୟ ଭିତରେ
ମନ ହୁଏ ଛଟପଟ ll 2
ବିତି ଯାଉଥିଲା ଖରା ବେଳ ରାତି
ତମ ସାଥେ କରି ଗପ
ବଢ଼ି ଯାଏ ଖରା ପାଏ ନାହିଁ ରାତି
ଆଜି କି କରିଛି ପାପ ll 3
ବଦଳି ଗଲା ଏ ଦୁନିଆ ନିୟମ
କହିବାକୁ ଲାଗେ ଡର
ବିବାହ ବେଦିରେ ବସିବାର ସ୍ବପ୍ନ
ହୋଇଗଲା ଚୂରମାର ll 4
ବିଛେଦର ଜ୍ବାଳା ପାରୁନି ମୁଁ ସହି
କରୋନା ବାଧୁଛି ଦାଉ
ବନ୍ଧା ଦେଇଥିଲି ଜୀବନଟା ସିନା
ଦେହଟା କି ଲାଭ ଆଉ ll 5
ବାଲକୋନୀ ଦର୍ଜା ଖୋଲି ଯେବେ ଦେଖ
ଝୁଲୁଥିବ ମୋ ଶରୀର
ବାସି ଶବ ଭାବି ଛୁଇଁବନି ଦେହ
ଭୂତାଣୁ ଆକ୍ରାନ୍ତ ମୋର ll 6
ବଞ୍ଚିଥିଲେ ତମେ ଆର ଜନମରେ
ଦେବି ମୁଁ ସିନ୍ଦୂର ଗାର
ବେଦୀରେ ବସାଇ ଫୁଲମାଳ ଦେଇ
ଘରଣୀ କରିବି ମୋର ll 7