ଆହେ! ତ୍ରିଲୋଚନ
ଆହେ! ତ୍ରିଲୋଚନ
1 min
166
ଆହେ! ତ୍ରିଲୋଚନ ଜଗତ ବନ୍ଦନ
ଘେନ ମୋ ଦୟିନି ଘେନ,
ତପରୁ ନିବୃତ୍ତ ହୋଇ ଆହେ! ତାତ
ଫେଡ ତୃତୀୟ ନୟନ ।
ଦେଖ ଦେଖ ତୁମ୍ଭ ସୃଷ୍ଟି ଭାଜୁଅଛି
ସୁଖ ଶିରୀ ଆଉ ନାହିଁ,
ସଂହାର କରତା ତ୍ରିଲୋକେ ବୋଲାଅ
ନୀରବ ଅଛ କିପାଇଁ ?
କେତେ ମାଆ କୋଳ ଶୂନ୍ୟ ହେଉଅଛି
ହଜୁଛି ପତ୍ନୀ ସିନ୍ଦୁର,
ଶିଶୁ ହରାଉଛି ପିତାମାତା ତା'ର
ଭାଙ୍ଗି ଯାଉଛି ସଂସାର ।
ଚତୁଃର୍ଦିଗେ ଉଠେ ନାରୀର ଚିତ୍କାର
ପିଶାଚ ଯାତନା ପାଇ,
ସତ୍ୟ ଧର୍ମ ନ୍ୟାୟ ଅଜଣା ବାସରେ
ଜନ ଡାକେ ତ୍ରାହି ତ୍ରାହି ।
ଫେଡ ଫେଡ ଶମ୍ଭୁ ତୃତୀୟ ନୟନ
ରଚ ହେ! ତାଣ୍ଡବ ନୃତ୍ୟ,
କଳୁଷ ବିନାଶି ଭର ସୁଖରାଶି
ମଧୁର ହେଉ ଜଗତ ।