ଆହ୍ବାନର ମନ୍ତ୍ର

ଗଗନେ ପବନେ ଗୁଞ୍ଜରି ଉଠୁଛି

ଅଦ୍ୟପି ମୁକତି ଆହ୍ୱାନ ବାଣୀ

ଜାଗ୍ରତ ହୁଅରେ ଭାରତ ସନ୍ତାନ

ସେହି ଗୁଞ୍ଜରଣ କର୍ଣ୍ଣରେ ଶୁଣି

ସ୍ମୃତି ପଟଳରେ ନାଚି ଉଠୁଅଛି

ଅତୀତର ମୁକ୍ତି ସଂଗ୍ରାମ ଛବି

ଅଦମ୍ୟ ସାହସ ଶତ ସିଂହ ବଳ

ଭରିନିଅ ହୃଦେ ସେକଥା ଭାବି

ନେତାଜୀଙ୍କ ପରି ତୁମ୍ଭେ ବୀର ସାଜି

ଭାରତବାସୀଙ୍କ କଷଣ ନାଶି

ମନେ ଗର୍ବ ବହି ମଥା ଉଚ୍ଚ କରି

ଚାଲିଯାଅ ବାଟ ଏକତ୍ର ମିଶି

ଦେଶପୀରତିର ମଧୁର ସଙ୍ଗୀତ

ସୁନ୍ଦର ରାଗରେ ତୁଣ୍ଡରେ ଗାଇ

ଦେଶର ପ୍ରଗତି ପଥେ ସାଜି ରଥୀ

ନିଜ ପରିଚୟ ଭୁଲିବା ନାହିଁ

ସୁଭାଷଙ୍କ ପରି ଭାଷା ଭରି ମୁଖେ

ଚନ୍ଦ୍ର ସମ ଶାନ୍ତି ବିସ୍ତାରି ଦେଇ

ଜ୍ଞାନ ଆଲୋକରେ ସମଗ୍ର ଦେଶରୁ

ଅଜ୍ଞାନ ତିମିର ଦିଅ ହଟାଇ

ନେତୃତ୍ୱ ବହନ ସାମର୍ଥ୍ୟ ଶକତି

ପ୍ରକାଶିତ କର ନିର୍ଭୀକ ହୋଇ

ଶତ୍ରୁ ଅବରୋଧ କରିବା ନିମନ୍ତେ

ପଛଘୁଞ୍ଚା କେବେ ନକର କେହି

ଦେଶର ସମ୍ମାନ ଯଶ ଗଉରବ

ସର୍ବଦା ଅକ୍ଷୁର୍ଣ୍ଣ ରଖିବା ପାଇଁ

ସେବା,ତ୍ୟାଗ,ପ୍ରେମ ହୃଦରୁ ଝରାଇ

ସ୍ୱାର୍ଥକୁ ଆପଣା କରିବା ନାହିଁ

ଆହ୍ୱାନର ମନ୍ତ୍ର ଜପ କରି ନିତ୍ୟ

ମାଟି ମାଆ ପାଇଁ ଜୀବନ ଦେଇ

ସାର୍ଥକ ହୋଇବ ଆମରି ଜନମ

ମହାମାନବଙ୍କ କରୁଣା ପାଇ