शब्द:- सुर्य/चंद्र/प्रेमी

क्षितिजावरती सुंदर लहरी

आल्या रविकिरणांच्या

गोड स्वरांनी कोकीळ गाते

स्वागत गीत तयांच्या

कोवळी ही चैत्रपालवी

हिरवा नवतीचा रंग

सकाळ प्रहरी वाजवीतो

हा मंजुळ पावा श्रीरंग

ईवल्या ईवल्या पानांवरती

रविकिरणांच्या सुंदर राशी

चित्रकार हा कोण असे मग

रेखाटतो या सुंदर नक्षी ?

सोहळा हा निसर्गाचा

वसुंधरेचे रूप मनोहर

रानफुले अन् वृक्ष वल्ली

नक्षी काढीतो त्यावर दिनकर