पुणेरी पाट्या

या अशा पुणेरी पाट्या

खोचक पण रोचक असती

ही वेगळीच रे दुनिया

हे चोखंदळ जन असती

उपदेश आणखी सल्ले

यांना ना कमीच काही

हा अनुभव घेण्यासाठी

त्या पेठा फिरून पाही

ते दगड सुध्दा ओळखती

हा मुळचा अन तो परका

का डोके खराब करतो

चल मार कढीचा भुरका

नाहीच कुणाला जमली

या जगात त्यांची नक्कल

ते रोज लढविती न्यारी

एकेकच भलती शक्कल

ही पुणेकरांची वस्त्रे

त्यांनाच शोभती बाबा

तु केली जरी परिधान

आणशील कोठुनि गाभा?

हा विषयच व्यापक मोठा

याच्यावर होईल ग्रंथ

ही जीवनशैली भिन्न

हा वेगळाच रे पंथ !