प्रेमगाथा

वृत्तबद्ध रचना - (चित्तविलसित वृत्त)

दिनमणि शांत झाला

शशिधर व्योमि आला

हुरहुर दाट होई

लगबग चांदण्याला||१||

नित असल्याच वेळी

दमणुक शांतवाया

सुमधुर गीत गातो

श्रमिक भुलावयाला||२||

नवथर बालिका ती

प्रतिदिन वाट पाही

नकळत छंद लागे

तन मन धुंद होई||३||

कधितरि ओळखीची

तरल स्वरावली ती

उमलत चित्त जाई

लवकर नीज नाही||४||

अवचित साजणाचा

पदरव कानि आला

रुणझुण होत चित्ती

धडधड उरात आता||५||

वदत, "प्रिये, तुझा मी,

सवय तुझीच झाली,

गमत कुठेच नाही,

गडबड होत जाई."||६||

मधुर सुरात ती ही,

"तर मग," त्यास बोले,

"तन मन दान केले,

शरणहि आज आले."||७||

उधळत मोद आला

रवि दुसऱ्या दिसाला

परिणय मंगलाचा

सफलच प्रेमगाथा||८||