मन वेल्हाळ

तुझ्या गालावरची खळी

जणू मोहक गं चांदणी

तुझ्या काजळल्या डोळ्यांची

झुके अलवार पापणी 

झुके अलवार पापणी

तुझी चाहूल लागता

होई अचानक स्तब्ध

मन वेल्हाळ धावता

मन वेल्हाळ धावता

गुंफे सतरंगी धागे

रमे स्वतःत सर्वदा

नाद कोणता हा लागे

नाद कोणता हा लागे

गाव वेगळे हे सजे

दोन मनाच्या अंतरी

स्वरधुन वेडी वाजे

स्वरधुन वेडी वाजे

पैलतीरी सरीतेच्या

झाली उतावीळ राधा

शोधे व्याकुळ कृष्णाला