कितीदा

कितीदा गीत प्रेमाने तुझे ओठात यावे

कधी माझे तराणेही तुझ्या हृदयात यावे

सदा मी भासते तुजला सुखाने गोंदलेली

तळाशी दु:ख दडलेले तुझ्या ध्यानात यावे

मनी मी बांधले कंकण प्रितीने सांधलेले

मनाला वाटते आता तुझ्या विश्वात यावे

अपेक्षा फार माझ्या तरी आहेत कोठे

म्हणाले हेच की मी तुझ्या नावात यावे

जरा दोऱ्यास दु:खाच्या करावे सैल देवा

मनाच्या या पतंगाने नव्या मेघात यावे