माय मराठी

माझ्या मराठीची शान

आहे आगळी वेगळी

मायबोली या विविध

किती जपल्या जवळी...

मनोमनी तुझा ठाव

रेखे मनातील भाव

सुख-दु:खाच्या काळात

एक आपलेसे गाव...

तुझी थोरवी महती

साधु-संत सारे गाती

दाही दिशेने घुमते

माय मराठीची ख्याती...

तुझ्या उदरी जन्मले

शुरवीर व विद्वान

शब्दा शब्दात उमटे

थोर साहित्याची खाण...

गर्जे जयजयकार

तुझा डफ मृदुंगात

माझी मराठी दिसते

नऊ रस शृंगारात...

माझे तुझ्याच सेवेत

आहे कृतार्थ जगणे

माझी मराठीच बोली

आहे सांगते गर्वाने...