महाराष्ट्र मायभूमी

उषःकाळी भूपाळीचा 

आवाज घुमतो कानी

अज्ञानाच्या तिमीरातून जागेकरण्या 

दारी येते वासुदेवाची स्वारी

तुळजाईचे चरण स्पर्शूनी 

राष्ट्र करते वाराचा प्रारंभ 

चिंतेचा सागर दूर लोटूनी 

होई नवचैतन्य आरंभ 

शांत, संयमी, निर्मळ, लोभस 

अशी ही गोदा कृष्णाई 

घ्यावी अशी उत्तुंग भरारी 

शिकवी शिखर कळसुबाई 

शांतीचा वारसा जोपासती 

अजिंठा वेरूळ लेणी 

शिवबा शिकवी मावळ्यांना 

तलवारीची खेळी 

संग्रामाचा इतिहास अलौकीक

समजण्या दुर्ग घालती साद 

दुर्गाहुन मजबूत जवान मराठी 

त्याचा करू नये हो नाद 

राष्ट्रात माझ्या बळीराजाच्या 

कणा कणात भरला अंगार 

लावणीच्या घुंगरा घुंगरातून 

बोलत राही शृंगार 

नक्षलवाद दहशतवाद 

जात्याच्या दोन तळी 

अकस्मात मग निर्दोषांच्या 

दुःख वेदना भाळी 

कर्मभूमी परि शिकवी आम्हां 

झिजूनी कैसे व्हावे चंदन 

महाराष्ट्र मायभूमी चरणी 

माझे त्रिवार वंदन..... त्रिवार वंदन....