अनभिज्ञ मी

राजस सखी तू लाभली मजला 

तूच अंतरीचे गीत गं, 

तूच आशा, तूच दिशा

तूच मार्गदर्शक मनमीत गं...

विस्कटल्या,गोंधळलेल्या मनाची

सुज्ञ प्रभावी भाषा तू,

शांती वंच्छित आयुष्याची

चैतन्यमय अभिलाषा तू...

आकांताने रडणाऱ्या बाळासाठी 

सरल अंगाई गीत तू,

भावना अन शब्दांना बांधणारी 

बहरलेली प्रीत तू....

अवखळ ,चंचल तरी निरागस

अथांग,निर्मळ ज्ञानसिंधू तू,

खवळलेल्या भावनांचे करता मंथन

अखंड आस्थेचा बिंदू तू...

तू भेटण्या आधी सखे गं, 

अनभिज्ञ मी स्वतः स्वतःशी

देऊन लेखणी हाती माझ्या 

भेटवलेस मज नव्या रुपाशी

तूच सखी मज प्रिय अती गं

विसर तुझा न कधी पडावा, 

तुझ्याच शब्दांच्या ओल्या मातीत 

संस्कारी देह आता घडावा....