|| मैत्री ||

दोन मनांचं मीलन

जीवनाचं खरं धन;

मैत्री म्हणजे सुखांची

मनसोक्त उधळण.

मैत्रीचं रोपटं जेव्हा

मनात फुलू लागतं;

कुबेरी धनही तेव्हा

क्षुल्लक वाटू लागतं.

विश्वासाच्या पायावर

सदैव उभी असते;

कोणत्याही बंधनात

मैत्री बंदिस्त नसते.

संकटांशी लढताना

वादळ होऊन येते;

जीवनाच्या लढाईत

मैत्री तलवार होते.

सगळ्या नात्यांना आता

लागले आहे ग्रहण;

कोणीही कोणाचं नाही

जुगार झाले जीवन.

सुंदर जीवनासाठी

विश्व वाचले पाहिजे;

विश्व वाचविण्यासाठी

मैत्री केलीच पाहिजे...!