मावळत्या दिनकरा

दिसभर सर्वांसाठी

रवी कष्टला अपार

मावळत्या दिनकरा

घेई माझा नमस्कार ।।१।।

आगमन तुझे होता

जागे होई सृष्टी सारी

सजावट रांगोळीची

सडा सारवण दारी ।।२।।

पशू पक्षी झाडे वेली

सारे खुशीने फुलती

जन सारे  उत्साहाने

निज कामाला लागती ।।३।।

सातत्याने फिरतोस

कर्म योग तुझा सुरू

नित्य नेम  शिकवून

होशी साधकांचा गुरू ।।४।।

करो कुणी निंदा स्तुती

कुणी जरी शिव्या देती

भेदाभेद नाही  कधी

नाही दाखवत भीती ।।५।।

स्वतः देहाला जाळून

ऊब देतोस विश्वाला

मावळत्या दिनकरा

नमस्कार माझा तुला ।।६।।