जीवनातले नवरंग

या रंगपंचमीला म्हणतो सखे

 भेट देईन हिरवा रेशीम चुडा 

 पाठवीन मी तुझ्या घरी 

शुभ्र साखरेचा पुडा

 गुलाब फूलतील गालावरती

 लज्जेचे अन प्रेमाचे

 अंजिरी रंगाच्या पैठणी वरती

 मोर नाचतील सौख्याचे

 निळा रंगाचा लेवून शालू

 लग्नाला तू उभी राहशील

 सावरीत मोरपिशी शेला

 मजकडे हळूच चोरून पाहशील 

मामा घेईल पिवळी साडी

 वरातीस लाल मारुती गाडी

 माहेरच्या विरहाची झालर थोडी

 दिसेल शोभून आपली जोडी

 पायामध्ये जोडवी, पैंजणी

 कंठा मध्ये कृष्ण मणी

 घेऊनी सुखाची पर्वणी

 जीवनात येशील तू साजणी

 नवरंगाची सारी उधळण

 करूया आपुल्या जीवनी

 संसाराचा हाकू गाडा 

 मी राजा अन् तू राणी