जीवन एक संघर्ष - गजरा

केसांमंधी माळला मी सुगंधी मोगऱ्याचा गजरा,

*गजऱ्याला दृष्ट नका लावू राया करा खाली नजरा*..!!धृ!!

 तुमच्या पिरतीची अशी नशा भिनली,

अंगाअंगात जणू नागीण सळसळली.

या जवानीचा शृंगार माझा बाई हसरा.

*गजऱ्याला दृष्ट नका लावू राया करा खाली नजरा*..!!१!!

माझं रूप आलं असं ऐन भराला,

जसं टचकण पाड लागतो फळाला.

धुंदी नजरेत पिरमाची घेऊनशीनी करीते मुजरा,

*गजऱ्याला दृष्ट नका लावू राया करा खाली नजरा*..!!२!!

गजरा शोभतो शृंगाराचा होऊनी राजा,

तुमच्या साठी राया जीव वेडापिसा माझा.

रूप खुलूनी भाव मनी माझ्या नाचरा,

*गजऱ्याला दृष्ट नका लावू राया करा खाली नजरा*..!!३!!