Library
Profile
जातीअंत
जातीअंत
जात म्हणता म्हणता
किती होशील दिशाहीन
माणसात शोध माणूस
माणसाची पडली वाण
जात म्हणता म्हणता
किती सांडशील रक्त
सगळे एका भाकरीसाठी
झाले दिशाहिन फक्त
जात म्हणता म्हणता
माणुसकीचा खून होतो
लहानमोठ्या भ्रमापायी
माणसाचा जीव जातो
जात म्हणता म्हणता
किती करतोस वाटणी
लाल, निळा, हिरवा माझा
करुनी माणसाची छाटणी
जात म्हणता म्हणता
झाले दीनदुबळ्याचे हाल
सत्तेला नसती जात
ते करतात जातीचे भांडवल
जात म्हणता म्हणता
रोज घडवितात जाळपोळी
दंगल कत्तली घडवून
निखाऱ्यावर त्यांचीच पोळी
जात म्हणता म्हणता
पोट भराया लागते भाकर
काबाड कष्ट करुन फार
माणुस जातीसाठीच बेजार
जात म्हणता म्हणता
ती कधी निघून जाईल
जातीअंत होईल कधी
कधी जातील बेड्या गळुन
जात म्हणता म्हणता
तेवत ठेवा माणवतेची मशाल
मिटवु दे जातीजातीचा अंधार
स्नेहबंध मानवतेशी कर खुशाल
जात म्हणता म्हणता
टोळके करतात घातपात
खेळखेळती सत्ता जातीचा
लाल रक्ताची एक जात
जात म्हणता म्हणता
तुझ्या सवे जाईल विरुन
कर्तृत्वाने उजळ दाही दिशा
जातीवंत उतरंडी जातील गळून
