पाऊले चालती

 *साहित्य प्रकार - अभंग लेखन*
पाऊले चालती

 पाऊले चालती |आळंदीची वाट|
दिंडीचा हा थाट | ज्ञानेशाच्या ||1

 हालला कळस | निघाले माऊली |
खेळती पाऊली | भक्तगण ||2

 जेजुरी मुक्काम | खंडेराया भेट |
अवघड वाट | घाटाचिया ||3

 घोड्याचे रिंगण | वारकरी दंग |
नाचतात संग | माऊलीच्या ||4

 सारे देव येती | पांडुरंग भेटी |
पंढरीत दाटी | वैष्णवांची ||5

 तुळशीची माळ |कपाळी हो बुका|
 देहुत हा तुका | शोभतसे ||6

 घातला हा वेढा | भिमा चंद्रभागा |
 जोडला हा धागा |अमृताचा ||7

 भक्ताचेच लाड| किती केले देवा |
रुख्मीनीला हेवा | वाटलासे ||8

 आबीर बुक्याची | तुला रे आवड |
झाली परवड | रुख्मीनीची ||9

 आषाढी वारीत |आले सर्व संत |
मनी नाही खंत | संसाराची ||10

 दुर्गा देशमुख परभणी