गावी चाल मित्रा
गावी चाल मित्रा
घेऊन आज सुट्टी येऊ फिरून मित्रा
थोडे चलायचे का गावाकडून मित्रा
शहरातला उन्हाळा देहास सोसवेना
गावी नदीत थोडे येऊ बुडून मित्रा
डोसे भजी समोसे खाऊन वीट आला
चिंचा रसाळ आंबे येऊ चखून मित्रा
बांधू कसे घराला माती महाग आहे
गावी जुना निवारा येऊ लिपून मित्रा
फेकून दूर छत्री पाऊस चाल खेळू
पाण्यात पावसाच्या नाचू भिजून मित्रा
गर्दीत माणसांच्या माझा कुणी दिसेना
खेळू लपाछपी मी जातो लपून मित्रा
आईविना कुठे रे प्रेमास अर्थ आहे
आईस भेटताना आले भरून मित्रा
लाटेत सागराच्या वाहून शंख आले
धावून शंख घेऊ गोळा करून मित्रा
रोखू कसे कळेना डोळ्यात आसवांना
ये ना मिठीत माझ्या घेऊ रडून मित्रा