एका गुरुची महती

एका गुरुची महती

किती वर्णावी ती थोर

गुरु असे पाठीराखा

नसे जीवा कधी घोर

गुरु मांडतो विचार

गुरु देतो ज्ञानामृत

कक्षा ओलांडून जीवनाच्या

नवा देतो दृष्टिकोन

गुरु दाखवी वाट

गुरु घडवी जीवन

गुरु सानिध्यात जेव्हा

गळे माझे 'मी' पण

गुरु शिष्यांचा सांगाती

गुरु सामान्यांचा सोबती

तरी गुरु एक सेवेकरी

म्हणे स्वतःस सेवाव्रती

गुरु ज्ञानाचा प्रकाश

गुरु सत्संगाचा उपदेश

गुरु संवाद अजोड

गुरु सद्विचारांचा अवकाश

करावी गुरुभक्ती अपरंपार

न मानावे कुणा सान-थोर

गुरु सानिध्यात व्हावे

अवघे जीवन साकार