द्वंद्व तो की ती चे...

स्वतःच्या जन्मावर तिचे किंवा त्याचे

 बरेचसे प्रश्नचिन्ह ऊमटलेले 

मी ती की तो...? या वरच विचार करत

 हे आयुष्य निसटलेले... {१}

सुदृढ देह लाभलेला तरीही 

बायकी नजाकत न्यारी 

शरीराशी विसंगत वागणे म्हणून

 त्याचे समाजात स्थान अर्धनारी...{२}

 समाजाने नाकारलेल्या या जीवाला 

आणि मनाला ही प्रश्न बरेच पडलेले 

काय वाकडीक होती नशीबाशी

 म्हणून हे जगणे असे घडलेले..{३}

 छक्का हिजडा नामकरणातली विव्हलता

 क्षणो क्षणी जाळत असते 

रस्त्यावरची त्या हाताची टाळी

 ह्रदयातुन आक्रंदताना दिसते.. {४}

माणसाचे माणसाशी असणारे 

माणुसकीचे नातेच ईथे संपलेले 

तो की ती या नजरेतुन बघतानाही

 वासनांध विचारानेच जाळलेले .. {५}

भडकशा त्या रंगरंगोटीचा 

अर्थ कोणी ना जाणिला

मिळेल तस ओरबाडुन घ्यावं

 या विचारानेच प्रत्येक जण चेकाळलेला ...{६}

असेल काही नैसर्गिक गुंतागुंत 

त्या जीवाच्या गर्भनाळेची.. 

समाज का गाजवतोय षंढ मर्दुमकी 

त्यांचं जगणं नाकारण्याची..{ ७}

थोडं भानावर यावं समाजाने 

माणसासारखं त्या मनाला ही जगू द्यावं... 

कुविचारांच्या सगळ्याच शस्रांना

 समाजाने आता म्यान करून ठेवावं... {८}

जिवंत मनाच्या त्या देहाला 

अभिमानाने जगण्याच्या वाटेनं जाऊ द्या ....

 समाजातला घटक म्हणून 

त्याला ही मोकळा श्वास घेऊ द्या {९}