ऋण माझ्या लेखणीचे

धारदार अक्षरांना लावण्याचा साज आहे

नित्य माझ्या लेखणीत संस्कृतीचा साज आहे

बंदीवान चौकटीला ठोकरलं लेखणीने

अस्तित्वाच्या लढाईत जिंकलेय स्वकष्टाने

मनातल्या भावनांना साथ दिली लेखणीने

आभाळाला भिडलेय निर्भिडत्या ठामपणे

धडपड माझी होती लेखणीला भेटण्याची

लेखणीच झाली माझ्या जन्मदाती अक्षरांची

व्यासंगीक वैचारिक तळपत्या भावनांची

लेखणीने दाखवली वाट मला सन्मार्गाची

बोट लेखणीचे माझ्या आता सुटणार नाही

अखेरच्या श्वासातही बंध तुटणार नाही

खूप काही दिलं मला निरंतर पुरणारं

लेखणीच्या कृपेमुळे अमरत्व लाभणारं

विसरता येत नाही ॠण माझ्या लेखणीचे

झाले साकारीत आता स्वप्न माझे साहित्याचे