दोघांची मने वितळून एक झाली
दोघांची मने वितळून एक झाली
आपल्या दोघांची मने
वितळून एक झाली
आजच मला याची
सखे प्रचिती आली ||0||
तुझंच गायलेलं गाणं
पाठलाग माझा करतं
दिसतं तुझंच चित्र
सर्वत्र ओझरतं
दृष्टी माझी तूझ्या
देखाव्यात नहाली
आजच मला याची
सखे प्रचिती आली ||1||
तुझ्या नावाचा सखे
उल्लेख आज झाला
वलय माझ्या हृदयी
तुझ्याच नावाला
तुझ्याविना वाटतं
जग खाली खाली
आजच मला याची
सखे प्रचिती आली ||2||
तुझ्याच पेहेरावात
कोणीतरी दिसतं
वाटतं तूच आहेस
आणि मन फसतं
अस्तित्व जाणवतं
तुझंच भोवताली
आजच मला याची
सखे प्रचिती आली ||3||
असं वाटतंय माझ्या
कवेत तू आहेस
श्वास घेतोय त्या
हवेत तू आहेस
तुझा स्पर्श जाणवतोय
हृदयी आणि गाली
आजच मला याची
सखे प्रचिती आली ||4||
फुलात तुझा चेहरा
खुणावतो मला
सुगंधही तोच आहे
तुझ्या केसातला
तुझ्या आठवणीने
रात्र झाली मखमली
आजच मला याची
सखे प्रचिती आली ||5||