चारोळी

चारोळी १ 

वाटला जरी कणखर तो

तोच असतो हळवा

बाप म्हणून मिरवताना

बंध घाली आसवा

चारोळी २ 

काना तोंडाचा भार हल्ली 

बोटा डोळ्यांनी उचलला आहे

कितीही लिहीलेले वाचले तरी

मन ऐकायलाच आसुसले आहे.

चारोळी ३  

तिच्या नसण्याने तिचे असणे 

अजूनच अधोरेखित होते

असते तेव्हा लज्जेने बिलगू देत नाही

नसते तेव्हा तिची आठवण मिठी सोडतच नाही

चारोळी ४ 

गोड गोड गुलाबी प्रीतीतल्या कोणी 

धरलीच नाही जर कधी मिठाची गुळणी

नसणार मग अबोला नसणार मनधरणी

 प्रेमाची चव मग नाही का होणार अळणी

चारोळी ५

पावसातली ती नाही आज दिसणार

आज ती बहुधा उन्हातच न्हाणार

पण ऊनपावसाची आता नाही मला तमा

माझ्या मनातच तिने थाटलाय तिचा लवाजामा

चारोळी ६  

 त्रिकोणी कुटुंबातल्या लेकीचे

 होताना एकाचे दोन

आईचे गलबले मन

जाणिवेने होताना तीनाचे दोन