बळी राजा

काळ्या काळ्या रानामधी

सोन्यावानी पिकं आलं

बैलगाडी भरून सुगीला

धान्य घराकडं आलं

बाजारामधी न्हाय भाव त्याला

रात्रंदिस राबून फळ नाही कष्टाला

घोर लागून राही जीवाला

लावून घेतो फास गळ्याला

निसर्ग पण पाठ फिरवतोय

नाही पाऊस वेळेवर

सरकार मात्र पॅकेज देतंय

आमचा जीव गेल्यावर

हात जोडून सांगतो तुम्हाला

योग्य भाव द्या शेतमालाला

नाहीतर जगाचा पोशिंदा

उरलं फक्त नावाला

जगाची भूक भागवणारा

तोच आज उपाशी झोपतोय

बँकेचे हफ्ते फेडण्यासाठी

लाचार होऊन कर्जमाफी मागतोय

खरंतर भीक नकोय कोणाची

साथ आहे काळ्या मातीची

सोन्यावाणी पीक काढीन कष्टानं

पण जगणार नाही लाचारीने

मुलाच्या कॉलेज ची फी भरायला

जमीन आमची विकायची

अन सरकारी नोकरी करणार

पोर बड्या बापाची

विनंती आहे सरकारला

विसरू नको अन्नदात्याला

न्याय हवाय बळीराजा ला

जगाच्या पोशिंद्याला