भेट पावसातली

आठवणींच्या गाठोड्याची सोडता गाठ

पावसातली भेट आपली आठवे दाट

चिंब भिजूनी सखी बिलगली दाट रानात

रिमझिम पाणी झुळझुळ गाणी फिरे अंगात

चुंबन घडता चढे पाऊस मग मुसळधार

वीज कडाडे बाहूत मिळे तुझ्या आधार

तोड बंधना पुरे वंचना मनाचे भास

चिंब होवून थेंब पिऊनी नाचली खास

टपटप टपटप झरझर झरझर सरीवर सरी

चिंब चिंब गं थेंब थेंब गं जशी जलपरी

खळखळ खळखळ झरे वाहती तालावर गं

थरथर थरथर हात कंपती देहावर गं