अंतरंग
अंतरंग
रोज पाहते मी तुला
माझ्या मागे फिरताना
आणि लपून छपून
न्याहाळून पाहताना
पाहताना रोज रोज
कसा होतोस तू दंग
कधी कळणार तुला
सख्या माझं अंतरंग
तुझ्या भेटीसाठी उरी
माझ्या उमाळा दाटतो
तुझा चोरटा कटाक्ष
हवा हवासा वाटतो
खूप आवडते मला
तुझं चोरून पाहणं
समजून तू ही घेई
माझं अबोल बोलणं
रोज चकोरासारखी
तुझी वाट मी पाहते
आणि सजून धजून
उभी दारात राहते
तुला चोरून पाहता
कळी मनाची फुलते
तुझ्यासवे संसाराचे
स्वप्न मनात रंगते
काळजाची हूरहूर
तुझ्या भेटीने संपावी
रेशमाच्या बंधनात
गाठ लग्नाची बांधावी