अंकुर

पडे मृगाचा पाऊस

धरा झाली ओलीचिंब

प्रेमधारा त्या पिऊनी

पाही गोड प्रतिबिंब l l १l l

हुंगी परिमल मृदा

गीत आनंदाचे ओठी

रूजे अंकुर हिरवा

माय धरित्रीच्या पोटी l l २l l

कुठे वसे तो शेतात

कुठे असे रानोवनी

दगडात, डोंगरात

जन्म घेई माळरानी l l ३l l

मिळे उबारा कुणाला

होई वेल, वृक्ष, तरु

कुणी वाढे एकटेही

वाटे जगू किंवा मरू l l ४l l

मिळे खतपाणी ज्याला

फुलं, फळांचा बहर

ज्यांना पानांचाच घेर

झेली उन्हाचा कहर l l ५l l

बीज रुजवू, वाढवू

येई जीवना आकार

स्वप्न हिरवे उद्याचे

तेव्हा होईल साकार l l ६l l